Qorbaçovun nəvələrinin lüks həyatları: Rok, "Zelensky" arağının satışı, Ukraynaya pul köçürmələri...

Sovet İttifaqının ilk və son prezidenti Mixail Qorbaçovun nəvələri - 45 yaşlı Kseniya Qorbaçova və 37 yaşlı Anastasiya Virqanskayanın Almaniyada necə yaşadığı öyrənilib.

Oxu.Az-ın verdiyi məlumata görə, bu barədə "Shot" "Telegram" kanalı araşdırma aparıb

Bildirilir ki, 45 yaşlı Kseniya Qorbaçova və 37 yaşlı Anastasiya Virqanskaya babalarının çox bağlı olduğu Almaniyaya köçüblər.

"Həm Kseniya, həm də Anastasiya getməzdən əvvəl uzun müddət Rusiyada yaşayıb, MQİMO-nu bitirib və Rublyovkada möhtəşəm malikanədə və Moskvada Kosıgin küçəsindəki nomenklatura binasında 300 kvadratmetrlik mənzildə yaşayıblar. Qızlar mütəmadi olaraq sosial mediada görünürdülər. Anastasiya hətta ölkənin ən yaxşı gəlin namizədi hesab olunurdu", - deyə nəşrdə bildirilib.

Kanal vurğulayıb ki, 2010-cu illərdə Qorbaçovun nəvələri tamamilə Berlinə köçüblər. Hazırda böyük bacı Kseniya biznes idarə edir - "ViniGrandi" kolleksiya şərabları mağazasını təbliğ edir. Bu işi əvvəlcə onun ögey atası qurmuşdu. Ukraynada müharibə başladıqdan sonra şirkət sarı-mavi etiketli "Zelensky" arağının satışını təşkil edib, sosial media paylaşımında spirtli içki almaq təklif olunub və vəsaitlər Ukraynaya dəstək üçün yönəldilib.

Qorbaçovun kiçik nəvəsi Anastasiya ögey atasının yükdaşımaları ilə məşğul olan iki şirkətinin idarəedici direktoru kimi qeydiyyatdadır. Onun həyat yoldaşı Dmitri Zanqiyev Berlinin "Abanamat" rok qrupunda ifa edir. Yaxınlarda qrup "Stop War in Ukraine" mahnısını yazıb və dinləyicilərdən toplanan pullar da Ukraynaya göndərilir.

Qorbaçovlar ailəsi həmçinin Moskvadakı 300 kvadratmetrlik mənzili satıblar. Onlar Bavariyada Hubertus qəsrini alıblar. Teqernze dağ gölünün sahilində yerləşən 570 kvadratmetrlik malikanə üçün 7 milyon avro ödənilib. İlkin məlumata görə, Berlində tarixi binada da Kseniya Qorbaçovanın mənzili var.