"Nəriman Həsənzadə sovet ideologiyasının buxovlarını yumşaldaraq Azərbaycan ədəbiyyatını real həyata yaxınlaşdıran sənətkarlardan biri idi".
Oxu.Az xəbər verir ki, bu fikirləri AMEA-nın prezidenti, akademik İsa Həbibbəyli Xalq şairi Nəriman Həsənzadənin vida mərasimində çıxışı zamanı səsləndirib.
Akademik bildirib ki, Nəriman Həsənzadə Bəxtiyar Vahabzadə, İsmayıl Şıxlı, Nəbi Xəzri, İsa Hüseynov, Fikrət Qoca və Məmməd Araz kimi görkəmli ədiblərlə birlikdə Azərbaycan ədəbiyyatında yeni mərhələnin formalaşmasında mühüm rol oynayıb.
Onun sözlərinə görə, şair Azərbaycan ədəbiyyatının müxtəlif dövrləri arasında mənəvi və bədii körpü yaradıb.
İsa Həbibbəyli vurğulayıb ki, Nəriman Həsənzadə başdan-başa lirika hadisəsi idi:
"Onun yüzlərlə yaddaqalan, həzin və səmimi lirik şeirləri ilə yanaşı, nitqi də, danışığı da, təbiəti də lirika üzərində qurulmuşdu. Adama elə gəlirdi ki, Nəriman Həsənzadə yeriyən, yaşayan, hərəkətdə olan bir lirika abidəsidir".
O qeyd edib ki, Nəriman Həsənzadə Azərbaycan ədəbiyyatına mühüm yeniliklər gətirib:
"Ona qədər lirik və epik poemalar yazılsa da, dramatik poemanın ən mükəmməl nümunələrini ilk dəfə Azərbaycan ədəbiyyatına Nəriman Həsənzadə gətirib".
Akademik əlavə edib ki, şairin "Atabəylər" dramı Azərbaycan dramaturgiyasının ən dəyərli nümunələrindən biridir:
"Atabəylər" dramı mənə görə yalnız Səməd Vurğunun "Vaqif" və "Mənsur" tarixi dramları ilə müqayisə oluna biləcək mükəmməl sənət əsəridir".
İsa Həbibbəylinin sözlərinə görə, Nəriman Həsənzadə elmi fikrin inkişafına da mühüm töhfələr verib:
"O, Azərbaycan ədəbiyyatının öyrənilməsinə tədqiqatçı kimi də böyük xidmət göstərib, tarixi və elmi faktları bədii əsərə çevirməyin mükəmməl nümunələrini yaradıb".
Sonda AMEA prezidenti vurğulayıb ki, Nəriman Həsənzadə cismani olaraq bu dünyadan köçsə də, əsərləri ilə əbədiyyət qazanıb:
"Bu gün o, cismani olaraq aramızdan ayrılsa da, əsərləri ilə əbədi yaşamaq haqqını qazanıb".
Qeyd edək ki, Xalq şairi Nəriman Həsənzadə ötən gün səhər saatlarında vəfat edib.
