"Bu gün mən həm övladı, həm dostu, həm də bir tələbəsi kimi Ramiz müəllimi yola salıram".
Oxu.Az xəbər verir ki, bunu Xalq artisti Ramiz Quliyevlə vida mərasimində mərhumun oğlu Əməkdar artist Əyyub Quliyev deyib.
O, bu gün danışmağın çox çətin və ağır olduğunu söyləyib:
'Çünki Ramiz müəllim dahi sənətkar, böyük şəxsiyyət idi. O, xalqına, vətəninə, millətinə bağlı olan bir insan idi. Xalqın içindən çıxmış, hər zaman xalqımızın həm çətin, həm də xoş günlərində onların yanında olan bir insan idi. Milli ruhda böyümüş və həmin o milli ruhu bizə aşılamış böyük bir şəxsiyyət idi. Onu itirmək, həqiqətən, bizim üçün böyük dərddir. Bu, bütün xalqımız üçün böyük itkidir".
"Çünki mübarizə aparırdıq. Son üç həftə reanimasiyada idi. Bizi tək qoymayan insanlara təşəkkürümü bildirmək istəyirəm. Əlbəttə, ölkə başçımız, möhtərəm Prezidentimiz İlham Əliyev, ölkəmizin birinci xanımı Mehriban Əliyeva və Heydər Əliyev Fondu bizə böyük dəstək oldular, o çətin günlərdə tək qoymadılar. Biz onu artıq evə gətirmişdik, ümidlərimiz var idi, yaxşılaşmağa doğru gedirdi. Amma nəsib olmadı... Ümid edirdi ki, tezliklə ayağa qalxacaq. Başınız sağ olsun, Azərbaycan mədəniyyətinin başı sağ olsun", - deyə Ə.Quliyev bildirib.
Onun sözlərinə görə, Ramiz müəllimin ruhu yaşayır:
"Onun yetişdirdiyi tələbələri var - tanınmış sənətkarlar, Xalq artistləri, Əməkdar artistlər, gözəl ifaçılardır. 1970-ci illərdən Bakı Musiqi Akademiyasında dərs deyib. Saysız-hesabsız kitablar, məcmuələr, lent yazıları, ifalar qoyub. Bax, bu hamısı onun bizə qoyduğu mirasdır.
İllər keçəcək, amma Ramiz müəllim həmişə xatırlanacaq. Onun sənəti unudulmayacaq. Çünki o, böyük bir məktəbin - tar məktəbinin qurucusu idi. Onun tələbələri, övladları, nəvələri onun ruhunu yaşadacaqlar".
Aygün Mirakif
