Burak Özçivit qadın pərəstişkarı ilə şəkil çəkdirmək üçün bir milyon dollar alıb?- Modeldən açıqlama

Məşhur türkiyəli aktyor Burak Özçivitin tədbir üçün Qətərə səfəri zamanı qadın pərəstişkarlarından biri ilə şəkil çəkdirməsi müqabilində bir milyon dollar aldığına dair yayılan xəbərlərə aydınlıq gətirilib.

Bu barədə Oxu.Az "Habertürk" nəşrinə istinadən xəbər verir.

Qeyd edək ki, ərəb ölkələrində olduqca məşhur olan Burak Özçivitlə bağlı ötən gün səsləndirilən bu iddia sosial mediada geniş müzakirə olunub. Həmçinin bununla bağlı video da sosial şəbəkələrdə yayılıb.

İddiaya görə, aktyorla şəkil çəkdirmək üçün pərəstişkarı olan qadın ona bir milyon dollar (36 milyon 114 min lirə) pul ödəyib.

Burak Özçivit məsələ ilə bağlı açıqlama verməyib və səssiz qalıb. Onunla şəkil çəkdirən qadının isə model Aynura Daudova olduğu üzə çıxıb.

Aynura Daudova öz "Instagram" hesabında məsələ ilə bağlı açıqlama verib və xəbəri təkzib edib.

"Bu, yalan məlumatdır", - deyə o bildirib.

Qeyd edək ki, modelin "Instagram" hesabında onun "Miss Princess Of The Universe 2022" və "Miss World Next Top Model 2023" müsabiqələrinin qalibi olduğu bildirilib.