"Oskar" qazananlardan biri "Evdə tək" filminin aktyorudur

Ötən gecə amerikalı aktyor Kiran Kalkin karyerasında daha bir irəliləyiş edərək "Ən yaxşı ikinci dərəcəli kişi roluna görə" "Oskar" mükafatını qazanıb. O, bu nominasiyada Yura Borisov, Edvard Norton, Qay Pirs və Ceremi Stronqu geridə qoyub. Mükafatlandırma mərasimi martın 2-dən 3-nə keçən vaxt "Dolbi" Teatrında (Los-Anceles) baş tutub.

Oxu.Az bu barədə Hellomagrussia.ru-ya istinadla xəbər verir.

Kiran ailəsində "Oskar" qazanan ilk şəxs kimi emosional təşəkkür nitqi ilə çıxış edib. Lakin aktyor doğma qardaşı, Hollivud ulduzu Makoley Kalkini təşəkkür siyahısına daxil etməyib, bununla da pərəstişkarlarını çaşbaş salıb.

42 yaşlı K.Kalkin Cessi Ayzenberqin "A Real Pain" filmindəki çıxışına görə qalib gəlib. "Oskar" onun üçün çoxdan gözlənilən mükafat olub, bu barədə o, səhnədəki çıxışında da qeyd edib. Nitqi zamanı o, həyat yoldaşı Caz Çartondan sevgi ilə danışıb, hətta "Succession" serialındakı həmkarı Ceremi Stronqu xatırladıb. Lakin 44 yaşlı böyük qardaşı Makoley Kalkinin adını çəkməyib.

Pərəstişkarlar buna xeyli təəccübləniblər, çünki Makoley və Kiran qardaş olmaqla yanaşı, uşaqlıqda birgə karyeralarına başlayaraq "Evdə tək" ("Home Alone", 1990) filmində rol almışdılar. Kiran nitqində digər qardaş və bacılarının, heç valideynlərinin də adlarını çəkməyib.

Bunun əvəzinə o, şəxsi həyatından maraqlı bir hekayə danışıb.

"Caz, səni sevirəm. Mən həyat yoldaşıma hər şey üçün təşəkkür etməliyəm, xüsusilə də bizə övladlar bəxş etdiyi üçün. Bir il əvvəl eyni səhnədə olarkən heç düşünmədən ondan üçüncü övladımızı istədiyimi söylədim. Çünki o mənə demişdi ki, əgər mükafat qazansam, bir körpəmiz də olacaq. Amma bu sözləri ona görə demişdi ki, mənim qalib gələcəyimə inanmırdı. Sonradan bu onu narahat etdi. O gecə məni yanına çəkib dedi: "Dördüncü övladımızı dünyaya gətirərəm, əgər "Oskar"ı qazansan".

Bu zarafat salonda alqışla qarşılanıb. Ardınca Kiran əlavə edib ki, onlar həyat yoldaşı ilə sadəcə, əl sıxışıblar və bu mövzuya bir daha toxunmayıblar.

Kiran Kalkin kimdir?

Kiran Kalkin - amerikalı aktyor, Makoley Kalkinin kiçik qardaşıdır. Karyerasına uşaqlıqdan başlayıb və "Home Alone", "Father of the Bride" kimi filmlərdə rol alıb. Əsl tanınma ona HBO-nun məşhur "Succession" serialındakı Roman Roy obrazı ilə gəlib.

2023-cü ildə Kiran İtaliyanın lüks brendi "Zegna"nın elçisi seçilib.

"Oskar"dan əlavə, "A Real Pain" filmindəki rolu ilə o, "Qızıl Qlobus" və BAFTA mükafatlarına da layiq görülüb.