Məşhur türkiyəli aktrisa Ezgi Molanın İspaniyadakı milyonlarla dəyərində olan evi "işğal edilib"

Məşhur türkiyəli aktrisa Ezgi Mola İspaniyanın Barselona şəhərində aldığı evi "okupas" hərəkatının dəstəkçiləri tərəfindən zəbt edilib.

Bu barədə Oxu.Az "Sabah" qəzetinə istinadən xəbər verir.

Məlumata görə, Ezgi Mola 2023-cü ildə Barselonanın sıx yaşayış bölgələrindən biri olan El Bornda ev alıb. Lakin "okupas"lar kimi tanınan, tərk edilmiş və ya istifadə olunmayan evləri sosial və ya yaşayış məqsədilə "işğal edən" bir qrup aktrisanın evini bir müddətdir boş qalmasından istifadə edərək zəbt edib.

Qeyd edək ki, 2008-ci il qlobal böhranından sonra İspaniyada hökumət vətəndaşlarına dəstək olmaq üçün imkanı olmayanların mənzil kirayəsi ödəmədən, pulsuz olaraq evlərdə yaşamasına icazə verən qərar qəbul edib. Lakin qeyri-qanuni miqrantlar bundan istifadə edərək boş evlərə qeyri-qanuni yolla daxil olmağa başlayıblar. Bu hal ictimaiyyətdə narazılıq yaradıb və "okupas" (ispanca "okupa" - işğalçı) adlandırılıb.

Molanın İspaniyadakı evinin satış qiyməti açıqlanmasa da, bölgədəki mənzil qiymətlərinin 700 min avrodan (1 milyon 350 min manat) başladığı və milyonlarla avroya çata biləcəyi bildirilir.

Ezgi Molanın Barselonada yaşayan dostu evi yoxlamaq üçün getdiyi zaman içəridə kiminsə yaşadığını görüb və aktrisaya xəbər verib. Ezgi Mola bununla bağlı qanuni tədbir görərək, evini geri almaq üçün hüquqi mübarizəyə başlayıb.

Lakin İspaniyada "okupas" məhkəmə proseslərinin kifayət qədər uzun müddət davam etdiyi məlumdur. Hüquqi proseslərin aylar, hətta illər çəkə biləcəyi qeyd edilir. Bu səbəbdən də Molanın qısa müddətdə evini geri ala bilməsi çətin görünür.