Ötən gün “Number One” mükafatlandırma mərasiminə qatılan müğənni Nadir Qafarzadə ona təqdim olunan mükafatdan imtina edib.
Oxu.Az Qafqazinfo-ya istinadən xəbər verir ki, müğənni buna səbəb kimi təşkilatçılığın normal vəziyyətdə olmamasını göstərib:
“Ötən gün xoşagəlməz bir nüansla qarşılaşdım. Belə ki, bir müddət öncə təşkilatçı məni özünün təsis etdiyi “Number One” mükafatının təqdimetmə mərasiminə çağırmışdı. Hörmətsizlik olmasın deyə ötən gün mükafat verilən məkana getdim. Məqsədim mükafat almaq deyildi. Sadəcə bu tədbiri təşkil edənlərə qarşı bir jest idi. Bir sözlə, həmin tədbirə getdim. Amma kaş getməzdim. Çünki təşkilatçılıq sıfır dərəcəsində idi.
Ədalətsizlik də var idi.
Çünki elə bir gənc müğənnilərə mükafat verirdilər ki, mən o sırada özümü görmədim. Buna baxmayaraq, həmin gənclərə uğurlar arzulayıram. Mükafat alanlar sırasında hörmət etdiyim sənətçiləri də görmək olardı. Onlar mükafata layiq idi. Orda olan bəzi gənc müğənnilər söylədiyim fikirlərdən inciməsin. Mənim kimdənsə çəkinəcəyim yoxdur. Obyektiv sözümü hər zaman demişəm.
Deyirəm, deyəcəm.
Ötən gün ən böyük iradım, həmin tədbirin təşkilatçısına idi. İşə qarşı bu cür məsuliyyətsizlik olmaz. Qaldı ki, şou-biznesdə bütün nominasiyalarda “Nömrə-1” müğənni mükafatının mənə təqdim olunmasına, bunu istəmirəm, gərəksizdir. Özüm bilirəm ki, məndən yoxdur. Şou-biznesdə bir Nadir Qafarzadə var. O da mənəm. “Nömrə-1”liyimi hansısa təşkilatın verdiyi mükafatla təsdiqləmək niyyətində deyiləm. Bu mükafatı, mükafat alarkən sevincdən uçanlara, sosial şəbəkədəki səhifələrində fərəhlə paylaşanlara təqdim etmək gərəkdir”.
N.Qafarzadə daha sonra xəbərdarlıq edib:
“Xahiş edirəm bundan sonra məni bu cür təqdimetmə, mükafatlandırma mərasimlərinə dəvət etməyin. Xəbərdarlıq edirəm. Getməyəcəm. Məni narahat etməyin”.
