Dünən “Addım” Gənclər Təşkilatının, Azərbaycan Respublikası Prezidenti yanında Gənclər Fondu, Gənclər və İdman Nazirliyi, Səhiyyə Nazirliyinin İctimai Səhiyyə və İslahatlar mərkəzinin dəstəyi ilə həyata keçirdiyi No Smoking Film Festivalının final gecəsi keçirilib.
Oxu.Az xəbər verir ki, Park Cinema-da gerçəkləşən gecəni çıxış sözü ilə “Addım”ın təsisçiləri Eldar Qasımov və Hüseyn Cavadzadə açıblar. Qonaqları salamladıqdan sonra festivalın finalına vəsiqə qazanmış 18 film nümayiş olunub. Nümayişdən sonra münsiflərin səsverməsinin hesablandığı zaman səhnəyə ukraynalı müğənni Andrey Yurets dəvət olunub.
Müğənni öz repertuarındakı mahnılarla bərabər qonaqlar üçün məşhur “Səndən nigaranam” mahnısını ingilis dilində ifa edib. Müğənninin ifasından sonra münsiflərin səsverməsi əsasında seçilən qaliblər elan olunub. Belə ki, festivalın baş mükafatını Elçin Telmanoğlu alıb. Qran-pri və pul mükafatını qalibə ötən ilki No Smoking Film Festivalının qalibi Nərmin Knyazlı təqdim edib.
Bundan başqa “Ən yaxşı rejissor” Elvin Abdullayev, “Ən yaxşı ssenari” Müşfiqə Hüseynli, “Ən yaxşı idea” Cavanşir Eladisoy, “Ən yaxşı aktyor oyunu” Fidan Cəfərova, “Ən orijinal film” İbrahim Baxşıyev nominasiyalar və pul mükafatlarını əldə ediblər. Gecənin aparıcısı məşhur dj Valid Əliyev olub.
