"Azərbaycanda ötən il 14 bələdiyyə ilə bağlı cinayət işi açılıb".
Oxu.Az xəbər verir ki, bunu ədliyyə nazirinin müavini Toğrul Hüseynov Milli Məclisin bugünkü plenar iclasında deyib.
Qeyd edək ki, o, parlamentdə bələdiyyələrin fəaliyyətinə inzibati nəzarəti həyata keçirən orqanın 2025-ci il üzrə fəaliyyətinə dair məruzənin müzakirəsi zamanı çıxış edib.
Nazir müavini qeyd edib ki, İnzibati Xətalar Məcəlləsinin 549-cu maddəsinə əsasən, ötən dövr ərzində 50 inzibati xəta protokolu (2024-cü ildə bu rəqəm 103 olub) tərtib olunaraq məhkəmələrə yönləndirilib:
"Həmin protokollar üzrə məhkəmə qərarları ilə 43 bələdiyyə rəsmisi inzibati məsuliyyətə cəlb olunub, hazırda isə 3 protokol məhkəmə icraatındadır.
İnzibati nəzarət tədbirləri çərçivəsində 62 fakt üzrə (2024-cü ildə 51 fakt) cinayət tərkibinin əlamətləri müəyyən edilib və toplanmış sənədlər hüquqi qiymət verilməsi məqsədilə müvafiq istintaq orqanlarına təqdim olunub. Həmin materiallar əsasında artıq 14 fakt üzrə (2024-cü ildə 21 fakt) cinayət işi açılıb, bəzi hallarda qanun pozuntularının aradan qaldırılması üçün təqdimatlar verilib, digər materialların araşdırılması isə istintaq orqanlarında davam etdirilir".
Samir Əli
