"VII çağırış Azərbaycan Respublikasının Milli Məclisinə seçki Azərbaycan dövlətçilik tarixində öncəki seçkilərdən kəskin şəkildə fərqlənib".
Oxu.Az xəbər verir ki, bu barədə Azərbaycan Demokratik İslahatlar Partiyasının Milli Məclisə seçki ilə bağlı bəyanatında deyilir.
Bəyanatda bildirilib ki, bundan öncə Milli Məclisə keçirilən seçkilərin heç biri bütün ölkə ərazisini əhatə edə bilməyib:
"Seçki prosesinin əvvəlindən başlayaraq sona qədər hər bir addım tam qanunauyğun şəkildə yerinə yetirilib və namizədlər üçün münbit demokratik mühitdə azad seçki keçirilib. Seçkidə heç bir maneə ilə rastlaşmadan qeydiyyatdan keçən Demokratik İslahatlar Partiyasının 5 namizədi mübarizə aparıb. Seçici imzalarının toplanması, seçicilərlə aktiv təbliğat görüşlərinin keçirilməsi, partiya üzvlərinin müşahidəçi kimi seçki dairələrində qeydiyyatdan keçirilməsi tam sərbəst şəkildə icra olunub. Təbliğat kampaniyası zamanı yaradılan təhlükəsiz mühit seçkinin demokratik və sərbəst şəkildə keçirilməsinin ilkin qarantı olub".
Eyni zamanda qeyd edilib ki, seçki kampaniyası dövründə həm ATƏT-in Seçkiləri Müşahidə missiyası, həm də Türk Dövlətləri Təşkilatının Beynəlxalq Müşahidəçilər Missiyası Demokratik İslahatlar Partiyasının qərargahını ziyarət edərək ölkədəki seçki mühiti və partiyanın namizədlərinə yaradılan şəraitlə maraqlanıblar:
"Partiya sədri Asim Mollazadə onlara partiyanın seçkilyə hazırlıq vəziyyəti, seçkiqabağı təbliğat və təşviqat kampaniyası ilə bağlı məlumat verib. Seçki prosesi ilə bağlı qonaqları maraqlandıran sualları cavablandırıb. Demokratik İslahatlar Partiyası ölkə üzrə 9, dairələr və məntəqələr üzrə isə 3360 nəfər müşahidəçi ilə seçki prosesini canlı izləyib. Səsvermə günü beynəlxalq müşahidəçilərlə birgə apardığımız müşahidələr seçkinin qanunauyğun və azad rəqabət mühitində keçirildiyini sübut edib. Partiyamız namizədlərin təbliğat və təşviqat kampaniyası üçün yaradılan şəraiti demokratiyanın və fikir azadlıqlarının təmin olunmasının göstəricisi kimi dəyərləndirir. Lakin bəzi seçki məntəqələrində müəyyən namizədlər və onların nümayəndələri tərəfindən seçki prosesinin pozulması cəhdlərinə təəssüfümüzü ifadə edirik.
MSK-nın açıqladığı ilkin seçki nəticələrinə və ekzitpolların nəticələrinə əsasən rəqiblərindən daha çox səs toplayan partiyamızın sədri Asim Mollazadə başda olmaqla uğur qazanan digər namizədləri də təbrik edir, bizə etimad göstərən seçicilərə minnətdarlığımızı bildiririk", - bəyanatda qeyd edilib.
