Respublika üzrə dairə seçki komissiyasının tərkibi yenidən formalaşdırılıb.
Oxu.Az xəbər verir ki, bu barədə Mərkəzi Seçki Komissiyasının bugünkü iclasında məlumat verilib.
Mərkəzi Seçki Komissiyasının (MSK) sədr müavini Rövzət Qasımov bildirib ki, Milli Məclisdə üstünlük təşkil edən partiyanın deputatlarının (YAP) təklifinə əsasən, 125 dairədən 49-da dəyişiklik edilib. Bu çərçivədə 16 dairədə sədr dəyişikliyi olub.
MSK-nın katibi Arifə Muxtarova isə Milli Məclisdə heç bir siyasi partiyanın üzvü olmayan deputatların təklif etdiyi namizədlər barədə məlumatı iclas üzvlərinə çatdırıb.
Qeyd olunub ki, 375 nəfərdən 25 faizi xanımlardır.
Həmçinin MSK-nın katibi Mikayıl Rəhimov Milli Məclisdə azlıq təşkil edən siyasi partiyaların dairələr üzrə təklif etdiyi namizədlər barədə məlumat verib. Qeyd olunub ki, onlardan 113 nəfəri yenidir. Bildirilib ki, həmin şəxslərdən 291 nəfəri kişi, 84 nəfəri isə qadındır.
Yekunda məsələ səsə qoyularaq qəbul olunub.
Qeyd edək ki, Seçki Məcəlləsinə əsasən, hər DSK-nın 9 üzvü olur, onlardan 3-nün namizədliyi deputatları Milli Məclisdə (MM) çoxluq təşkil edən siyasi partiyanı ( YAP) MSK-da təmsil edən komissiya üzvləri tərəfindən, 3-nün namizədliyi deputatları MM-də azlıq təşkil edən siyasi partiyaları MSK-da təmsil edən komissiya üzvləri tərəfindən, 3 üzvün namizədliyi isə heç bir siyasi partiyaya mənsub olmayan MM deputatlarını MSK-da təmsil edən komissiya üzvləri tərəfindən təqdim olunur.
