Azərbaycanın ədalətli mövqeyni qəbul etməyən AŞPA və onun nadan rəhbəri

Avropa Şurası Parlament Assambleyası (AŞPA) növbəti dəfə Azərbaycana qarşı qərəzli yanaşması və ittihamları ilə gündəmə gəlib. Assambleyanın prezidenti Teodoros Rusopulosun "Alpha News" qəzetinə müsahibəsində ölkəmiz haqqında sərsəm fikirlər səsləndirib. Azərbaycan Xarici İşlər Nazirliyi Teodoros Rusopulosun Azərbaycan əleyhinə səsləndirdiyi iddiaları qətiyyətlə rədd edib və pisləyib:

"Avropa İnsan Hüquqları Məhkəməsinin qərarları ilə bağlı mövqeyimizə gəldikdə, Azərbaycanın məhkəmənin hakimlərinin seçimlərində iştirak etmədiyi nəzərə alınmaqla, onların qəbul etdiyi qərarların Azərbaycan tərəfindən icra olunmasını tələb etmək absurddur. Bu şəraitdə, məhkəmənin qərarlarının yerinə yetirilməsi mümkün deyil".

Mövzu ilə bağlı Oxu.Az-a danışan Milli Məclisin deputatı Vüqar Rəhimzadə deyib ki, Avropa Şurası Parlament Assambleyasının (AŞPA) prezidenti Teodoros Rusopulosun "Alpha News" qəzetinə müsahibəsi zamanı ölkəmizin əleyhinə səsləndirdiyi cəfəng, riyakarlıqla dolu fikirlər qəbuledilməzdir:

"AŞPA-nın zaman-zaman Azərbaycana qarşı qərəzli yanaşma sərgilədiyinin şahidi olmuşuq. Azərbaycan bu təşkilata üzv olandan sonrakı dövr ərzində ermənipərəst, islamofob, Azərbaycanofob qüvvələr bu təşkilatdan daim ölkəmizə qarşı vasitə kimi istifadə ediblər. Ümumiyyətlə, bu qurumdan müstəqil siyasət həyata keçirən üzv dövlətləri hədəfə almaq üçün platforma kimi istifadə olunur. AŞPA-da siyasi korrupsiya, ayrı-seçkilik, etnik və dini nifrət, ikili standartların hökm sürdüyünü təsdiqləyən kifayət qədər faktlar mövcuddur. Qurumda mövcud olan dözülməz mühit fonunda Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırıb. Buna baxmayaraq, Azərbaycan tərəfi dialoq qapısını açıq saxlayır".

"Amma Azərbaycanın haqlı, ədalətli və konstruktiv mövqeyinin qarşılığında biz Teodoros Rusopulosun simasında siyasi mədəniyyətsizliyin, yalanın, qərəzin şahidi olduq. Rusopulos, Şvabe və onlarla eyni düşünən şəxslərin qərəzli, anti-demokratik, anti-Azərbaycan mövqeyi və qurumun ikili standartlar əsasında apardığı siyasəti ucbatından Azərbaycan xalqında AŞPA-ya qarşı haqlı nifrət yaranıb. Bu qurum və orada yuvalanan anti-Azərbaycan qüvvələr davamlı şəkildə ölkəmizin beynəlxalq hüquqa və ədalətə söykənən mövqeyinə kölgə salmağa çalışmaqla məşğuldurlar. AŞPA prezidenti Teodoros Rusopulosun məlum müsahibəsində səsləndirdiyi fikirlər heç bir çərçivəyə sığmır, siyasi mədəniyyətsizlik, tərbiyəsizlik və nadanlıqdır. Bu, diktator Rusopulosun rəhbərlik etdiyi qurumda hökm sürən çürümüş təfəkkürün, acınacaqlı vəziyyətin göstəricisidir. Göründüyü kimi, güclü, qüdrətli Azərbaycanın müstəqil siyasətini qəbul edə bilmədiklərini bu yolla ortaya qoyurlar", - deyə o əlavə edib.

Mərahim Nəsib