Azərbaycanda yay fəslində havaların isti keçməsi ilə əlaqədar hərbi hissələrdə xüsusi rejimin tətbiq olunmasına başlanılıb.
Oxu.Az ANS PRESS-ə istinadən xəbər verir ki, bu barədə Trend-ə Müdafiə Nazirliyinin mətbuat xidmətinindən bildirib.
Məlumata görə, artıq müdafiə naziri, general-polkovnik Səfər Əbiyev bununla bağlı müvafiq əmr imzalayıb.
Nazirin əmrinə əsasən, isti yay günlərində hərbi hissələrdə şəxsi heyət saat 11:00-dan 17:00-dək günün altında olmur, əsasən kölgəliklərdə və kazarma şəraitində saxlanılır, xidməti işlərə cəlb olunmur.
Artıq bununla bağlı hərbi hissələrə müvafiq telefonoqramlar da göndərilib. Məqsəd əsgər və zabitləri istidən və onun doğurduğu fəsadlardan, xüsusən də günvurmadan qorumaqdır.
Qeyd edək ki, Ekologiya və Təbii Sərvətlər Nazirliyinin Milli Hidrometeorologiya Departamentinin yaydığı məlumata görə, növbəti ay Azərbaycanın bəzi ərazilərində havanın temperaturu 40 dərəcəyədək yüksələcək.
