Mən Cəbrayılı görməmişəm, yaşım azdır. Amma atam, babam mənə Cəbrayılın hər qarışı haqqında danışıblar. Görməsəm də, həmişə xəyalımda Cəbrayıl cənnət kimi olub".
Bu sözləri Oxu.Az-a açıqlamasında bu gün Cəbrayıl şəhərinə qayıdan keçmiş məcburi köçkün Murad Şıxıyev deyib.
O bildirib ki, Cəbrayıl şəhəri ailəsinin ona danışdığı qədər gözəl və səfalıdır:
"Cəbrayıl haqqında mənə o qədər danışıblar ki, mənə bu torpaqlar çox doğmalaşıb. Sanki ən yaxın dostuma, qardaşıma, ailə üzvümə qovuşuram. Gedib görmüşəm Cəbrayılı. Atamın, babamın mənə dediyi qədər gözəldir, səfalıdır. Çox şükür ki, bu günləri görmək anama nəsib oldu. Kaş atam da bu günləri görərdi.
Bu günləri bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!"
Xatırladaq ki, bu gün Cəbrayıl şəhərinə növbəti köç karvanı yola salınır. Bu mərhələdə 50 ailə (199 nəfər) öz doğma yurduna köçürülür.
Qeyd edək ki, hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 50 mindən çox insan yaşayır.
Rövşən Əsədov
