Ceyhun Bayramov: "Düşmənçilik səhifəsini bağlamaq çağırışımız bir ilə yaxın cavabsız qaldı"

"Azərbaycan İkinci Qarabağ müharibəsində öz torpaqlarını 30 illik işğaldan azad etdikdən sonra Ermənistanla ölkəmiz arasında əlaqələrin normallaşması üçün fürsət yarandı".

Oxu.Az xəbər verir ki, bunu Azərbaycanın xarici işlər naziri Ceyhun Bayramov "Anadolu" agentliyinə müsahibəsində deyib.

Onun sözlərinə görə, rəsmi Bakı 2021-ci ildə Ermənistana düşmənçilik səhifəsini bağlamağı təklif etsə də, bu çağırış bir ilə yaxın cavabsız qaldı.

Nazir qeyd edib ki, 2022-ci ilin ilk aylarında sülh sazişinin beş əsas bəndini Ermənistana təqdim etdikdən sonra həmin ilin oktyabr ayında iki ölkə arasında sülh müzakirələri başlayıb:

"Sülh sazişinin ilk layihəsi də Azərbaycan tərəfindən yazılıb və Ermənistana təqdim edilib. Danışıqlar təqribən iki il yarım çəkib. Təxminən bir ay əvvəl müzakirələr başa çatıb və mətnlə bağlı razılıq əldə olunub. Həll edilməli olan mühüm amillər mövcuddur. Bunlardan ən önəmlisi Ermənistan Konstitusiyasında Azərbaycanın ərazi bütövlüyünə qarşı iddiaların yer almasıdır. Bu, davam etdikcə sülh sazişinin imzalanması mümkün deyil. Ermənistan Konstitusiyasının dəyişdirilməsi vacibdir".

C.Bayramov əlavə edib ki, Azərbaycanın daha bir şərti 1990-cı illərdə Qarabağ münaqişəsinin həlli üçün yaradılmış ATƏT-in Minsk Qrupunun ləğv edilməsi ilə bağlıdır:

"ATƏT-in Minsk Qrupu 30 il ərzində heç bir nəticə əldə etməyib. Artıq Qarabağ məsələsi həll olunub və bu ərazilər Azərbaycanın bir hissəsidir. Ermənistan da bunu qəbul edib. Belə olan halda Ermənistanın Minsk Qrupunun fəaliyyətini davam etdirmək üçün davamlı səyləri bizdə suallar doğurur. Biz təkidlə Minsk Qrupunun buraxılmasını tələb edirik və gözləyirik. Artıq top Ermənistanın tərəfindədir", - deyə nazir bildirib.