MHP sədri Dövlət Bağçalı Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevi Ankarada keçiriləcək Türk Dövlətləri Təşkilatının Zirvə görüşünə dəvət etməsinin mühüm əhəmiyyət daşıdığını bildirib.
Oxu.Az xəbər verir ki, Bağçalı bu barədə Milliyyətçi Hərəkat Partiyasının Mərkəzi İdarə Heyətinin, Mərkəzi İntizam Şurasının üzvlərinin və deputatların birgə toplantısından sonra yaydığı yazılı açıqlamada qeyd edib.
O bildirib ki, Türkiyə ilə Azərbaycan arasındakı münasibətlər ortaq tarix, dil, mədəniyyət, qarşılıqlı etimad və xalqların mənəvi birliyi üzərində qurulub.
"Dövlətlər arasında fərqli qiymətləndirmələr və həllini gözləyən məsələlər, əlbəttə ki, ortaya çıxa bilər. Əsas məsələ bu problemləri qardaşlıq münasibətlərinə xələl gətirmədən, qarşılıqlı anlaşma və birbaşa dialoq yolu ilə həll etmək iradəsini nümayiş etdirməkdir.
Türkiyə ilə Azərbaycanın bir-birinə duyduğu etimadın qorunması iki dövlət arasındakı həmrəyliyin davam etdirilməsi və türk dünyasının ortaq gələcəyinin təmin edilməsi baxımından vazkeçilməzdir", - deyə Bağçalı vurğulayıb.
MHP sədri gələn həftə Ankarada keçiriləcək Türk Dövlətləri Təşkilatının Zirvə görüşünün türk dünyasının ortaq gələcəyinə dair iradənin mühüm göstəricisi olacağını da bildirib.
