“FETÖ - Qubad İbadoğlu - Mübariz Mənsimov üçbucağı dövlətçiliyimiz üçün olduqca ciddi təhlükə mənbəyi ola bilər”.
Bu fikirləri “Report”a Milli Məclisin deputatı Hikmət Babaoğlu deyib.
Deputatın sözlərinə görə, FETÖ sıradan bir terror təşkilatı deyil:
“Çünki onun hədəfi hansısa kiçik məqsədlər yox, bir ölkədə öz “mürid”ləri vasitəsilə hakimiyyəti ələ keçirməkdən də böyükdür. Yəni FETÖ terror təşkilatının hədəfi bir milləti dövlətsizləşdirmək və lidersizləşdirmək, bir dini insanların zehninə “fetöçülük” kimi yenidən həkk etməkdir. Dolayısı ilə FETÖ-nün vəzifəsi sivilizasiyaların qarşıdurması kontekstində islam sivilizasiyasını məhz islamın öz dəyərlərini ona qarşı silaha çevirməklə sıradan çıxarmaqdır”.
O bildirib ki, FETÖ-nün Azərbaycana vura biləcəyi ziyanın miqyası təsəvvür edilməyəcək qədər böyükdür:
“Biz 15 iyul hadisələri vaxtı bu terrorçu təşkilatın nəyə qadir olduğunu qardaş Türkiyənin timsalında gördük. Türkiyə Cümhuriyyəti az qala mövcudluğunu itirəcəkdi.
Bu baxımdan FETÖ - Qubad İbadoğlu - Mübariz Mənsimov üçbucağı dövlətçiliyimiz üçün olduqca ciddi təhlükə mənbəyi ola bilər. Çünki bu üçbucaq həm ictimai şüuru hədəfə alan dağıdıcı ideologiya, həm manipulyativ siyasi müdaxilə, həm də onların fəaliyyətini dəstəkləyəcək ciddi maliyyə üçbucağıdır. Ona görə də bu terror vasitələri dərhal zərərsizləşdirilməlidir”.
“FETÖ - İbadoğlu - Mənsimov üçbucağı dövlətçiliyimiz üçün ciddi təhlükə mənbəyi ola bilər” - RƏY + FOTO/VİDEO
