Ermənistanın paytaxtı İrəvanda Qarabağda fəaliyyət göstərmiş separatçılara həsr olunan qondarma "Artsaxın çağırışı" adlı memorial kompleksin açılışı baş tutub. Mərasimdə qondarma rejimin sonuncu başçısı Samvel Şahramanyan, erməni müxalifətinin nümayəndələri və bir sıra ictimai xadimlər iştirak ediblər. Tədbir zamanı Azərbaycan əleyhinə revanşist çıxışlar səsləndirilib, Qarabağa dönüş iddiaları dilə gətirilib.
"Abidə"nin yanında Qarabağdan qaçan separatçıların əski parçası və Ermənistanın bayraqları da yerləşdirilib. Diqqətçəkən məqam isə ondan ibarətdir ki, bu hadisə Azərbaycanla sülh sazişini paraflayan rəsmi İrəvanın susqunluğu fonunda baş verib. Bu da Ermənistanın rəsmi mövqeyi ilə ziddiyyət təşkil edir. Sülh gündəliyinə sadiqlik iddiasında olan Ermənistan hökumətinin bu kimi təşəbbüslərə göz yumması ölkənin Azərbaycanın ərazi bütövlüyünə hörmət göstərmək öhdəliyini şübhə altına alır və regionda gərginliyi yenidən körükləyə bilər.
Mövzu ilə bağlı Oxu.Az-a danışan Milli Məclisin Hüquq siyasəti və dövlət quruculuğu komitəsinin üzvü, deputat Bəhruz Məhərrəmov bildirib ki, İrəvanda separatçıların "xatirəsinə" memorial kompleksin açılışı bu ölkənin Vaşinqtonda götürdüyü öhdəliklərlə daban-dabana ziddir və Azərbaycan ilə Ermənistan arasında sülh naminə etimad mühitinin formalaşmasına ciddi təhdid yaratmaqla İrəvanın sülh niyyətlərini şübhə altına alır:
"Məlumdur ki, Azərbaycan Respublikası və Ermənistan arasında sülhün və dövlətlərarası münasibətlərin təsis edilməsi haqqında Sazişlə tərəflər bir-birinə qarşı hər hansı ərazi iddialarının olmadığını və gələcəkdə belə iddialar qaldırmayacağını təsdiq ediblər. O cümlədən tərəflər digər tərəfin ərazi bütövlüyü və siyasi birliyini tamamilə və ya qismən parçalamağa yönəlmiş hər hansı hərəkətə, eləcə də belə hərəkətin planlaşdırılması, hazırlanması, həvəsləndirilməsinə və dəstəklənməsinə yol verməyəcəklərinə dair öhdəlik götürüblər. Bütün bunların fonunda Ermənistanın tarixin arxivinə göndərilmiş mövzuya yenidən müraciət etməsi, yaxud Azərbaycanın ərazi bütövlüyü və sərhəd toxunulmazlığına zidd hərəkətlərə göz yummaqla dolayısı ilə dəstəkləməsi qəbuledilməzdir".
Deputat vurğulayıb ki, Azərbaycan ərazilərini 30 ildən artıq bir müddətdə işğal və təcavüzə məruz qoymuş Ermənistanın həmin dövr ərzində dövlət səviyyəsində törətdiyi cinayətlərin nəticələrinin aradan qaldırılmasına və beləliklə də, qarşılıqlı razılaşdırılmış təhlükəsizlik və etimad quruculuğu tədbirlərinin həyata keçirilməsinə fokuslanmalı olduğu halda, Ermənistanın bu kimi təxribatlara birbaşa və ya dolayısı ilə əl atması regiona, ələlxüsus elə Ermənistanın özünə yaxşı heç nə vəd etmir:
"Azərbaycan və Ermənistan arasında artıq paraflanmış Sazişin 8-ci maddəsində separatizmin bütün təzahürlərini pisləyən Ermənistan cari addımı ilə beynəlxalq öhdəliklərinə hörmətlə yanaşmadığını göstərərək Azərbaycanın Ermənistan konstitusiyasında dəyişikliklərlə bağlı israrında nə qədər haqlı olduğunu göstərmiş olur. Yəni İrəvan nümayiş etdirir ki, imzaladığı istənilən beynəlxalq müqaviləni poza biləcək potensiala malikdir və bu səbəbdən Azərbaycan Respublikası Ermənistan konstitusiyasında müvafiq ərazi iddialarını ehtiva edən maddələrin mövcudluğundan əbəs yerə narahatlıq keçirmir".
"Bütün bunların fonunda, əgər Ermənistan hələ də sülh, sabitlik və əməkdaşlıq mühitində maraqlı olduğunu və öhdəliklərinə sadiq qaldığını sübut etmək istəyirsə, birmənalı şəkildə adıçəkilən abidə də daxil olmaqla, regionda, xüsusən bu ölkədə azərbaycanlılara münasibətdə dözümsüzlük, irqi nifrət, ayrı-seçkilik, separatizm, zorakı ekstremizm və terrorizmin bütün təzahürlərini ehtiva edən ədəbi-bədii, o cümlədən heykəltəraşlıq nümunələrini sıradan çıxarmalı, bununla da etimad quruculuğu tədbirlərində səmimi olduğunu praktik olaraq nümayiş etdirməlidir", - millət vəkili fikrini yekunlaşdırıb.
Mərahim Nəsib
