Ermənistanın baş naziri Nikol Paşinyan bildirib ki, Ermənistanın Kollektiv Təhlükəsizlik Müqaviləsi Təşkilatında (KTMT) iştirakı və bəzi ölkələrin respublikanın suveren ərazisindən kənarda silah yerləşdirilməsi ilə bağlı narahatlıqları onun beynəlxalq silah bazarına çıxışına mane olur.
Bu barədə Oxu.Az "Interfax"a istinadən məlumat yayıb.
"Məlum olduğu kimi, qlobal müdafiə silah bazarı Ermənistan üçün 2022-ci ilin mart ayından (Ermənistanın Qarabağı Azərbaycanın suveren ərazisi kimi tanımasından - red.) sonra Ermənistanın suveren ərazisindən kənarda silah yerləşdirilməsi ilə bağlı narahatlıqlar aradan qalxdı", - deyə N.Paşinyan ABŞ və Avropa İttifaqı səfirlərinin iştirakı ilə keçirilən "Ermənistan və dünya risklər və imkanların kəsişməsində" adlı müzakirədə bildirib.
Onun sözlərinə görə, "KTMT ilə bağlı ikinci bir nüans da var".
"KTMT-də iştirakımız bu beynəlxalq silah bazarına çıxış yolunda ciddi maneə idi. Bundan əlavə, 2022-ci ildə avadanlıq və silahlar üçün yüzmilyonlarla dollarlıq faktura ödənildiyi, lakin Rusiyadan çatdırılmaların baş tutmadığı bir vəziyyətlə qarşılaşdıq. Bu hadisələr bizi paradiqma dəyişikliyinin zəruri olduğunu anlamağa vadar etdi. Buna görə də, KTMT-dəki iştirakımızı dondurmaq barədə qanuni qərar qəbul etdik", - deyə Ermənistanın baş naziri bildirib.
2025-ci ilin noyabr ayında Ermənistan xarici işlər nazirinin müavini Mnatsakan Safaryan jurnalistlərə bildirib ki, Ermənistan hazırda KTMT-dən çıxmağı müzakirə etmir. Bu arada, Ermənistan Parlamentinin spikeri Alen Simonyan jurnalistlərə deyib ki, "biz faktiki olaraq KTMT-dən çıxmışıq".
