Suriyada Dəməşq, Laziqiyyə və Tartus şəhərlərində komendant saatı tətbiq edilir.
Oxu.Az-ın verdiyi məlumata görə, bu barədə "Al-Watan" xəbər yayıb.
Bildirilib ki, komendant saatı yerli vaxtla 17:00-dan 05:00-a (Bakı vaxtı ilə 18:00-06:00) qədər olacaq.
Qeyd edək ki, bir gün əvvəl Dəməşqdə saat 16:00-dan 05:00-a qədər (Bakı vaxtı ilə 17:00-06:00) komendant saatı tətbiq edilib.
Qərar "hərbi administrasiya" tərəfindən qəbul edilib.
Xatırladaq ki, noyabrın 28-də Suriya müxalifətinin silahlı qrupları Hələb vilayətinin qərb rayonlarında hökumət qüvvələrinə qarşı genişmiqyaslı hücuma başlayıb. Onlar Hələb şəhərini ələ keçirdikdən sonra növbəti təxminən bir həftədən bir az çox müddətdə Homs və Həmanı tutaraq Suriyanın paytaxtı Dəməşqə yaxınlaşıblar.
Bundan əlavə, Suriya Demokratik Qüvvələri (SDQ) kürd qruplaşması Deyr əz-Zor şəhərini nəzarətə götürüb.
Dekabrın 8-də gecə müxalifət qrupları Dəməşqi ələ keçirib. Suriya ordusunun komandanlığı Prezident Bəşər Əsədin hakimiyyətinin başa çatdığını elan edib.
