Xronika: "İslam peyğəmbərini ağır təhqir edən Nişanyanın arvadından etiraflar"

Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında "Yunan jurnalistinin İrəvan qeydlərində Azərbaycan gerçəyi" adlı veriliş hazırlanıb.

Verilişdə İslam peyğəmbərini ağır təhqir edən erməni Sevan Nişanyanın arvadı olan İra Tsuru adlı yunan jurnalistin azərbaycanlıların mədəni irsinin yeganə nümunəsi olan qədim İrəvanın Təpəbaşı məhəlləsi ilə bağlı etiraflarına və türkə olan nifrətindən söz açılıb.

Bildirilib ki, Təpəbaşının sahibinin azərbaycanlılar olduğunu yazan yunan jurnalistin İrəvan qeydlərində Azərbaycan gerçəyi yer alır: "İrəvan yüz il əvvəl erməni şəhərinə çevrilib. Şəhər azərbaycanlıların olub və sonradan erməni ailələri buralarda yerləşdirilib".

İ.Tsuru etiraf edir ki, 16 erməni ailəsi Təpəbaşı məscidində yerləşdirilib: "Muş ermənisi dərzi Sarkis Təpəbaşı məscidində içki süfrəsi açıb. O mənə konyak verdi ki, Təpəbaşına getməyim. Bizdən əsl gerçəyi gizlətmək üçün hər şeyə əl atıb. 2800 yaşlı İrəvanda köhnə şəhərin izləri məhv edilib. Ermənilər 29 hektar Azərbaycan ərazisində məskunlaşıb. Erebuni qalası ikinci əl avtomobil bazarının yanındakı tozlu divardan başqa bir şey deyil. İrəvanda yerli erməni əhalisinin olub-olmadığını bilmirik".

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Ətraflı Baku TV-nin süjetində: