Gənclər təşkilatları özəl sektorla əlaqələrini inkişaf etdirir - FOTO

Azərbaycanın ən böyük gənclər platforması, 147 gənclər təşkilatını ətrafında birləşdirən NAYORA-nın təşkilatçılığı ilə Azərbaycanda fəaliyyət göstərən gənclər təşkilatlarının korporativ sosial məsuliyyət (KSM) haqqında məlumatlılığının artırılması və gənclər təşkilatlarının maraqlı tərəflər ilə birgə fəaliyyətlərinin həyata keçirilməsi məqsədi ilə “KSM, özəl sektor və gənclər təşkilatlarının əlaqələrinin gücləndirilməsi” layihəsi həyata keçirilir.

Layihə çərçivəsində indiyə qədər müxtəlif qurumların aidiyyəti istiqamət üzrə nümayəndələri tərəfindən üç təlim keçirilib. Və bu təlimlərdə 40-dan çox gənclər təşkilatının 100-dən çox nümayəndəsi iştirak edib.

Qeyd edək ki, ilk təlim Azərbaycan Beynəlxalq Bankının Korporativ kommunikasiya şöbəsinin baş mütəxəssisi Könül Hilalla “Təşkilatlarda KSM strategiyasının tətbiqi” mövzusunda baş tutub. Görüş zamanı korporativ sosial məsuliyyət nədir, gənclərlə iş sahəsində necə tətbiq olunmalıdır, beynəlxalq təcrübədə təşkilatların KSM strategiyası kimi mövzular ətrafında ümumi müzakirələr aparılıb və iştirakçıların sertifikatları təqdim olunub.

İkinci təlim “Code Academy”nin Marketinq və Kommunikasiya Şöbəsinin rəhbəri Gülşən Cumayeva ilə “Yerli və beynəlxalq praktikada korporativ sosial məsuliyyətin tətbiqi və icra mexanizmləri” mövzusunda keçirilib. Təlim zamanı yerli və beynəlxalq təcrübənin təşkilatların fəaliyyətlərində tətbiqedilmə mexanizmləri mövzusu ətrafında interaktiv müzakirələr aparılıb.

Sonuncu təlim isə Mediasiya Şurasının İdarə Heyətinin sədri Nadir Adilovla “Gənclər təşkilatları və korporativ sosial məsuliyyət” mövzusunda oldu.

Məlumat üçün vurğulayaq ki, Qeyri-Hökumət Təşkilatlarına Dövlət Dəstəyi Agentliyinin dəstəyi ilə keçirilən layihə davam edir və əlavə olaraq iki görüş, bir forumun keçirilməsi nəzərdə tutulub.