"Eldar Əzizov" teqi üzrə xəbərlər
Eldar Əzizov 28 iyun 1957-ci ildə Bakıda anadan olub. 1979-cu ildə S.M.Kirov adına Azərbaycan Dövlət Universitetinin tarix fakültəsini fərqlənmə ilə bitirib. Həmin ildən Azərbaycan Komsomolu Mərkəzi Komitəsində müxtəlif məsul vəzifələrdə çalışıb.
1984-cü ildən 26 Bakı komissarı rayon komsomol komitəsinin birinci katibi, 1987-ci ildən Bakı şəhər komitəsinin birinci katibi işləyib.
1989-cu ildə Azərbaycan Komsomolu Mərkəzi Komitəsinin katibi seçilib. 1991-ci ildən Azərbaycan Gənclər İttifaqı Mərkəzi Komitəsinin katibi işləyib.
1990-cı ildə Azərbaycan Respublikası Ali Sovetinin deputatı seçilib, dəfələrlə Bakı şəhər Xalq Deputatları Sovetinin deputatı seçilib.
1998-ci ildə Azərbaycan Respublikası Mərkəzi Seçki Komissiyasının beynəlxalq əlaqələr şöbəsinin müdiri, 1999-cu ildən Bakı Şəhər İcra Hakimiyyətinin xarici əlaqələr və investisiya proqramları departamentinin sədr müavini təyin edilib. 2000-ci ilin martından Bakı Şəhər İcra Hakimiyyəti başçısının müavini, həmin ilin iyunundan Bakı şəhəri Nizami Rayon İcra Hakimiyyətinin başçısı işləyib.
2003-2011-ci illərdə Gəncə Şəhər İcra Hakimiyyətinin başçısı, 2011-2015-ci illərdə Sumqayıt Şəhər İcra Hakimiyyətinin başçısı, 2015-ci ilin sentyabrından Bakı şəhəri Səbail Rayon İcra Hakimiyyətinin başçısı olub. 16 iyul 2018-ci ildə Azərbaycan Prezidenti İlham Əliyevin sərəncamı ilə Bakı Şəhər İcra Hakimiyyəti başçısının müavini təyin edilib. 15 noyabr 2018-ci ildə Bakı Şəhər İcra Hakimiyyətinin başçısı təyin edilib.
1980-ci ildə SSRİ Ali Soveti Rəyasət Heyəti tərəfindən "Şərəf Nişanı" ordeni ilə təltif edilib. 2017-ci ildə "Vətənə xidmətə görə" ordeninin 2-ci dərəcəsi ilə təltif edilib. Azərbaycan Jurnalistlər Birliyinin üzvü, Azərbaycan Memarlar İttifaqının fəxri üzvü, "Difai" kitabının və 200-dən çox məqalənin müəllifidir.
