Nazirlik bu sahədə nəzarəti gücləndirmək və qanun pozuntularının qarşısını almaq üçün tədbirlər görür. Belə ki, əmək müfəttişliyi orqanları tərəfindən mütəmadi yoxlamalar aparılır, aşkar olunan nöqsanların aradan qaldırılması üçün işəgötürənlərə müvafiq göstərişlər verilir. Təkrar qanun pozuntusu hallarında isə ciddi cərimələr tətbiq edilir.
Qeyd edək ki, Azərbaycan Respublikasının Konstitusiyasına və Əmək Məcəlləsinə görə işçilərin əmək hüquqları dövlət tərəfindən qorunur. Hər bir vətəndaş qanunla müəyyən edilmiş iş vaxtı həddində təhlükəsiz və sağlam şəraitdə çalışmaq, öz əməyinə görə vaxtlı-vaxtında və layiqli məvacib almaq hüququna malikdir.
Əmək münasibətlərinin leqallaşması cəmiyyətin sosial rifahına əhəmiyyətli təsir edir. Bu səbəblə də işçiləri hüquqlarını tələb etməyə, işəgötürənləri isə qanunvericiliyin tələblərinə riayət etməyə dəvət edirik. Müsbət haldır ki, son illər ölkədə bu istiqamətdə görülmüş işlər sayəsində bağlanmış əmək müqavilələrinin sayında xeyli artım müşahidə olunmaqdadır.
