Yaponiyanın mərkəzi hissəsində baş verən güclü silsilə zəlzələlər nəticəsində İşikava prefekturasında azı dörd nəfər ölüb.
Bu barədə yerli hökumətə istinadən məlumat yayılıb.
Məlumata görə, İşikava və digər prefekturalarda azı 30 nəfər xəsarət alıb.
Mənbə: TASS
20:17
Yaponiya İmperator Evinin İdarəsi Tokioda imperator Naruhito və ailəsinin iştirakı ilə yanvarın ikisində baş tutmalı olan ənənəvi tədbirləri ləğv etmək qərarına gəlib.
Administrasiyadan bildirilib ki, müvafiq qərar Yeni il günü ölkədə baş vermiş güclü zəlzələlərlə bağlı vəziyyət nəzərə alınaraq qəbul edilib.
Məlumata görə, hər il yanvarın ikisində yapon xalqı Tokionun mərkəzində yerləşən İmperator Sarayına gəlir, burada imperator və monarxın ailəsinin digər üzvləri onları Yeni il münasibətilə təbrik edir. Pandemiya illərində (2020-2021) mərasim keçirilməyib.
Qeyd edək ki, İmperatoru təbrik etmək Yaponiyada yeni ilin əsas adətlərindən biridir.
Mənbə: TASS
17:57
Yaponiyanın İşikava prefekturasındakı təbii fəlakət 1885-ci ildə müşahidələr başlayandan bəri bölgədəki ən güclü zəlzələdir.
Bu barədə yaponiyalı seysmoloqlar məlumat yayıblar.
Həmçinin, Yaponiyada 18 mindən çox insanın həyatına son qoyan 2011-ci ildəki 9 bal gücündə zəlzələdən sonra ilk dəfə sunami təhlükəsi elan edilib.
Qeyd edək ki, Yaponiyada böyük sunami təhlükəsi artıq aradan qaldırılıb, lakin zəlzələlərə görə kiçik sunami təhlükəsi hələ də qalmaqdadır. Belə ki, Honsyu adasının şimal-qərb sahillərinə hündürlüyü 3 m-ə çatan dalğalar gözlənilir, bir sıra ərazilərdə isə artıq hündürlüyü 1,2 m-ə çatan sunami baş verib.
Yeri mediada yayılan məlumata görə, Vacima şəhərində ardıcıl zəlzələlərdən sonra güclü yanğın baş verib.
11:41
Yaponiyanın qərbində 7,6 bala çatan güclü zəlzələlər baş verib, yeraltı təkanlar Osaka və Kiotoda hiss edilib.
Bu barədə ölkənin Milli Meteorologiya İdarəsi məlumat yayıb.
Hazırda xəsarət alanlar və dağıntılar barədə məlumat yoxdur. Bununla belə, ölkənin bütün qərb sahilləri üçün sunami təhlükəsi elan edilib - dalğanın hündürlüyü 5 metrə çata bilər.
Yerli sakinlər dərhal sahilyanı əraziləri tərk etməyə çağırılıblar.
Eyni zamanda, bu anlarda bütün ölkə ərazisində güclü zəlzələlər barədə xəbərdarlıq sistemi üçüncü dəfə işə salınıb - yerli sakinlərə bildirilib ki, yeni təkanlara hazır olsunlar.
Mənbə: TASS
