Bakıda üç sahibkarın 4 milyon manatdan çox pulunu ələ keçirmə ittiham ilə həbs edilən 33 yaşlı birjaçı Alışan Nizami ilə bağlı detallar üzə çıxıb.
Oxu.Az "Qafqazinfo" istinadən xəbər verir ki, uşaqlıqdan birja fəaliyyəti ilə maraqlanan Nizami AzTV-nin keçmiş sədri Arif Alışanovun qardaşı oğludur.
Onun 4 il əvvəl vəfat etmiş atası Akif Alışanov da yüksək vəzifələrdə çalışıb. O, uzun illər polkovnik rütbəsi ilə Sumqayıt Mühafizə İdarəsinin rəisi işləyib. Sonuncu iş yeri isə Müdafiə Sənayesi Nazirliyinin Mühafizə və təhlükəsizlik şöbəsi olub, o, burada rəis vəzifəsində çalışıb.
Fotoda: Akif Alışanov
Tanınmış soyadın davamçısı Nizaminin qayınatası isə hazırda ABŞ-də yaşayan müğənni Elariz Məmmədoğludur. O, 2014-cü ildə müğənninin qızı Günellə evlənib. Cütlüyün toyu mediadan gizli saxlanılsa da, sonradan fotoları yayılıb.
Hazırda ağır cinayətə görə mühakimə edilən Alışan Nizami 2018-2019-cu illərdə elə əmisinin yanında - AzTV-nin İnformasiya və Texnologiya şöbəsinin müdir müavini işləyib.
Qeyd edək ki, Nizami Akif oğlu Alışanın oyunlarına qoşulub milyonlar itirənlər "Aztelekom" MMC-nin sabiq baş direktoru Məhəmməd Məmmədovun oğlu Babək Məmmədzadə, Nərimanov Rayon Prokurorunun sabiq müavini Zeynal Usubov və başqa sahibkar Yadigar İsrafilovdur.
Dustaq birjaçı Cinayət Məcəlləsinin 178.4-cü (dələduzluq-xüsusilə külli miqdarda ziyan vurmaqla törədildikdə) maddəsi ilə ittiham edilir. Amma ittihamı qəbul etmir. Bu cinayət məhkəmə hökmü ilə təsdiqini taparsa, Alışan Nizami ömrünün 10-14 ilini həbsdə keçirməli olacaq.
