Kaliforniyada yanğın qurbanlarının sayı artıb

Los-Ancelesdə (Kaliforniya ştatı) baş verən yanğınlar nəticəsində ən azı 11 nəfər həlak olub.

Oxu.Az bu barədə CNN telekanalına istinadən xəbər verir.

Telekanalın məlumatına görə, beş nəfər Poliseyds yanğın zonasında, altı nəfər isə yanğını əhatə edən İton ərazisində həlak olub. Əvvəllər 10 qurban barədə məlumat verilmişdi.

Los-Ancelesdə ümumi sahəsi 15.2 min hektar olan altı təbii yanğın davam edir. Ən böyük iki yanğın - İton və Poliseyds - müvafiq olaraq yalnız 3% və 8% lokallaşdırılıb.

Qeyd edək ki, ABŞ-də cümə günü Kaliforniyada təbii fəlakət səbəbindən 3.5 min aviareys ləğv edilib. Ştatda 169 min istehlakçı elektrik enerjisiz qalıb. Təxminən 10 milyard dollar dəyərində incəsənət əsərləri kolleksiyasının saxlanıldığı "Getty" Muzeyi əməkdaşlarının böyük hissəsini təxliyə etməli olub.