Ağcabədidəki ağır qəza nəticəsində yaralananların SON VƏZİYYƏTİ AÇIQLANDI

Ağcabədi rayonunun Hüsülü kəndi ərazisində baş verən yol-nəqliyyat hadisəsi zamanı xəsarət alanların son vəziyyətləri açıqlanıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, 26 fevral saat 10:40-da baş verən yol-nəqliyyat hadisəsi səbəbilə xəsarət alan dörd nəfər (üçü kişi, biri qadın cinsli olmaqla) Ağcabədi Rayon Mərkəzi Xəstəxanasına hospitalizasiya olunublar.

"Onlara bədənin müxtəlif nahiyələrinin çoxsaylı travmaları diaqnozu təyin edilib.

1972 və 1942-ci il təvəllüdlü (kişi cinsli) şəxslər yaxınlarının istəyi ilə Bərdə Rayon Mərkəzi Xəstəxanasına təxliyə ediliblər. 1948-ci il təvəllüdlü (kişi cinsli) və 2002-ci il təvəllüdlü (qadın cinsli) şəxslərə zəruri tibbi yardım göstərilib və ambulator müalicə üçün evə buraxılıblar", - deyə məlumatda bildirilib.

14:36

Ağcabədi rayonunda ağır yol-nəqliyyat hadisəsi baş verib.

Oxu.Az-ın məlumatına görə, rayonun Hüsülü kəndi ərazisində 44-BN-949 dövlət nömrə nişanlı "KamAZ", 10-EU-397 dövlət nömrə nişanlı VAZ-2106 və 99-EL-778 dövlət nömrə nişanlı "Lada Priora" markalı avtomobillər toqquşub.

Hadisə nəticəsində "Lada Priora"nın sürücüsü, 1979-cu il təvəllüdlü Allahverdi Yusif oğlu İmanov hadisə yerində həyatını itirib.

Müxtəlif dərəcəli xəsarətlər alan sürücünün atası, 83 yaşlı Yusif Allahverdi oğlu İmanov, 77 yaşlı Cəlilabad Əbdül oğlu Nadirov və 53 yaşlı Vüqar Cəmşid oğlu Əhmədov Ağcabədi Mərkəzi Rayon Xəstəxanasına çatdırılıblar.

Faktla bağlı araşdırma aparılır.

Əzizə İsmayılova