"Ölkəmizin qarşıdan gələn onilliklərdə uğurunun ən başlıca təminatçısı bugünkü gənclərdir. Onların yaradıcılıq potensialı, yenilikçi düşüncəsi və dəyişən dünyaya sürətli adaptasiya qabiliyyəti yeni iqtisadi modelin qurulmasında həlledici rol oynayacaq".
Oxu.Az xəbər verir ki, bu fikirləri Bakıda ilk dəfə keçirilən Gələcəyin Peşələri Sammitində əmək və əhalinin sosial müdafiəsi naziri Anar Əliyev deyib.
O bildirib ki, 2018-ci ildən etibarən dörd milyon insanı əhatə edən beş sosial islahat paketi həyata keçirilib:
"Bu islahatların illik əlavə maliyyə yükü 7.6 milyard manat təşkil edir. Bu dövrdə əmək müqavilələrinin sayı 44% artaraq 1.9 milyona çatıb, sosial rifahın ən bariz göstəricilərindən biri olan əməkhaqqı fondu isə 3.2 dəfə artıb.
Eyni zamanda, minimum əməkhaqqı 3.1 dəfə artaraq 400 manata, ortaaylıq əməkhaqqı isə iki dəfə artaraq 1 088 manata çatıb.
Bununla yanaşı, sosial ödənişlər sahəsində aparılan islahatların nəticəsi olaraq minimum pensiya 2.9 dəfə artaraq 320 manata, ortaaylıq pensiya isə 2.6 dəfə artaraq 540 manata yüksəlib".
Nazir əlavə edib ki, əhaliyə ödənilən müavinət və Azərbaycan Respublikası Prezidentinin təqaüdləri üzrə ödənişlərin həcmi bu dövr ərzində beş dəfə artıb:
"MDB ölkələri ilə müqayisədə alıcılıq qabiliyyəti pariteti üzrə ölkəmiz minimum pensiyada birinci, minimum əməkhaqqı və ortaaylıq pensiya üzrə isə ikinci yerdə qərarlaşıb".
Məhərrəm Əliyev
