Avtobus minik avtomobili ilə toqquşdu: XƏSARƏT ALANLAR VAR

"Bakıda sərnişin avtobusunun minik avtomobili ilə toqquşması nəticəsində üç nəfər xəsarət alıb".

Bu məlumatı Oxu.Az-a açıqlamasında Bakı Şəhər Dövlət Yol Polisi İdarəsinin (BŞDYPİ) bölmə rəisi, polis kapitanı Toğrul Nəsirli bildirib.

"Yol-nəqliyyat hadisəsi bu gün saat 12:30-da Məhəmməd Hadi küçəsində qeydə alınıb. "BakuBus"a məxsus 77-JS-645 dövlət nömrə nişanlı sərnişin avtobusu Şəhriyar Fərmanovun idarə etdiyi 90-FG-050 dövlət nömrə nişanlı "Mercedes" markalı minik avtomobili ilə toqquşub. Xəsarət alanlara tibbi yardım göstərilib.

Faktla bağlı araşdırma aparılır", - deyə T. Nəsirli bildirib.

16:24

Bakıda sərnişin avtobusu minik avtomobili ilə toqquşub.

Oxu.Az xəbər verir ki, hadisə Xətai rayonunun Əhmədli qəsəbəsində qeydə alınıb.

"Baku Bus" MMC-nin mətbuat katibi Əsmər Əliyeva Oxu.Az-a sorğusuna cavab olaraq verdiyi açıqlamasında faktı təsdiqləyib.

O qeyd edib ki, hadisə bu gün saat 12:20-də "Əhmədli" metrostansiyasının qarşısında baş verib.

"BakuBus" MMC-nin balansında olan və 62 nömrəli müntəzəm marşrut xətti üzrə hərəkət edən, 77-JS-645 dövlət qeydiyyat nişanlı avtobus minik avtomobili ilə toqquşub. Nəticədə minik avtomobilində olan bir qadın sərnişin xəsarət alıb və Təcili Tibbi Yardım əməkdaşları tərəfindən xəstəxanaya aparılıb.

Sərnişinlərin təhlükəsizliyinin və daşınmanın fasiləsizliyinin təmin olunması məqsədilə "BakuBus" MMC tərəfindən operativ tədbirlər görülüb, sərnişinlər dərhal eyni xətt üzrə hərəkət edən digər avtobusa yönləndirilib və marşrutun qrafiki qısa müddət ərzində bərpa olunub. Hadisə ilə bağlı aidiyyəti dövlət qurumlarına məlumat verilib. Hazırda məsələ ilə bağlı araşdırma aparılır", - deyə Ə.Əliyeva bildirib.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, bu gün Respublika Təcili və Təxirəsalınmaz Tibbi Yardım Mərkəzinə saat 13:50-də Xətai rayonu ərazisində yol-nəqliyyat hadisəsinin baş verməsi səbəbilə çağırış daxil olub:

"Çağırış əsasında təcili tibbi yardım briqadası ünvana cəlb olunub. Hadisə yerində üç nəfərə (bir kişi və iki qadın) ilkin tibbi yardım göstərilib və müştərək travma diaqnozu ilə Sabunçu Tibb Mərkəzinə hospitalizasiya olunublar. Bir nəfərə (kişi cinsli) müştərək travma diaqnozu ilə yerində tibbi yardım göstərilib",- deyə məlumatda vurğulanır.

Əzizə İsmayılova