Azərbaycan qadını: Onun hüquqları necə qorunur?

Baku TV-nin "Global Panorama" verilişinin yeni buraxılışı yayımlanıb.

Verilişin budəfəki sayında Azərbaycanda qadın hüquqlarının qorunması və gender bərabərliyinin təmin edilməsi sahəsində əldə olunmuş nailiyyətlərdən bəhs olunub.

Bildirilib ki, Azərbaycan müstəqillik əldə etdikdən sonra qadın və kişi bərabərliyini təmin etmək üçün müxtəlif qanunlar və proqramlar qəbul edilib:

"Bu sahədə ölkə daxilində aparılan islahatlar qadınların həm ictimai-siyasi, həm də sosial-iqtisadi baxımdan bərabər hüquqlara malik olmasını təmin edir. Qadınların həm özəl, həm də dövlət sektorunda mövqelərə yüksəlməsi üçün dəstək göstərilir. Bu isə təkcə qadınların cəmiyyətdə rolunu artırmır, həm də ölkənin inkişafına müsbət təsir edir. Azərbaycanda 106 il əvvəl qadınlara ölkə parlamentinin formalaşdırılmasında iştirak etmək hüququnun tanınması onların həm ictimai-siyasi, həm də sosial-iqtisadi həyatının ayrılmaz hissəsi kimi qəbul edilməsinə, cəmiyyətdə bərabər hüquqlarla təmsil olunmasına zəmin yaradıb. Son nəticədə qadınlarımız bütün sahələrdə rolunu genişləndirib və tədricən kişilərlə bərabər səviyyəyə çatıb".

Vurğulanıb ki, Azərbaycan qadınlarının ictimai-siyasi, sosial-iqtisadi həyatdakı uğurları ölkədə qadınlara verilən önəmi və dəstəyi əks etdirir. Mehriban Əliyevanın təşəbbüsü ilə həyata keçirilən layihələr cəmiyyətdə qadınların rolunu yüksəldib. Onların ölkə həyatında daha fəal iştirakını təmin edib:

"Xüsusilə Heydər Əliyev Fondu vasitəsilə irəli sürülən təşəbbüslər qadınlara mədəniyyət və təhsil sahələrində öz istedadlarını və bacarıqlarını sərbəst inkişaf etdirməkdə böyük kömək olur. Son nəticədə qadınlar Azərbaycan mədəniyyətinin beynəlxalq səviyyədə təbliğində böyük rol oynayırlar. Mehriban Əliyevanın fəaliyyəti qadınları həm ictimai-siyasi, həm də sosial-iqtisadi sahələrdə aktiv fəaliyyətə yönəldir, onları bacardıqca yüksək mövqelərə yüksəlməyə sövq edir. Birinci xanımın bütün məsələlərə səmimi və həssas yanaşması, ünvanlanan müraciətləri bacardıqca diqqətində saxlaması zərif cinsin nümayəndələrinin ona inamını gücləndirir, qadın hüquqlarının qorunmasında əvəzsiz rol oynayır".

Əlavə olunub ki, qadınların iqtisadi müstəqillik qazanması və iş dünyasında iştirakının artırılması üçün dövlət xüsusi dəstək layihələri həyata keçirir:

"Bu layihələr çərçivəsində qadınlar üçün iş imkanları genişləndirilir, onların özünü sahibkar kimi realizə etməsinə dəstək verilir. Kiçik və orta bizneslə məşğul olmaq istəyən qadınlara maliyyə dəstəyi, o cümlədən güzəştli kreditlər və qrantlar təklif olunur ki, bu da onların iqtisadi müstəqilliyini təmin edərək onların ailədə, cəmiyyətdə mövqeyini gücləndirir. İş və ailə həyatı arasında balans yaradır. Azərbaycan hökuməti ölkədə ailə institutunun qorunması, inkişaf etdirilməsi üçün qadınlara xüsusi qayğı göstərir. Ailə, Qadın və Uşaq Problemləri üzrə Dövlət Komitəsinin mövcudluğu buna bariz sübutdur. Adıçəkilən qurum ailə və uşaq problemlərinin qadın problemləri ilə əlaqəli şəkildə kompleks həllinə çalışır, bu sahədə dövlət siyasətini və tənzimlənməsini həyata keçirir. Bundan başqa, Azərbaycanda çoxuşaqlı analar və aztəminatlı ailələr üçün sosial yardımlar, müavinətlər verilir. Dövlətin ardıcıl olaraq həyata keçirdiyi yeni təşəbbüslər ölkədə qadınların sosial həyatını daha da yaxşılaşdırır".

Daha ətraflı videomaterialda: