Azərbaycanın Milli Qəhrəmanı Əlif Hacıyev 1953-cü il iyunun 24-də Xocalı şəhərində dünyaya gəlib.
O, 1970-ci ildə orta məktəbi, 1971-ci ildə isə Xankəndi şəhərindəki avtomobil məktəbini bitirib.
1971-73-cü illərdə Minsk şəhərində hərbi xidmətdə olub.
1976-79-cu illərdə SSRİ Daxili İşlər Nazirliyinin Frunze adına Xüsusi Milli Məktəbində təhsil alıb və sonra təhsilini SSRİ DİN-in Akademiyasında davam etdirib.
Belorusiya SSR DİN-in və Azərbaycan SSR Dağlıq Qarabağ Muxtar Vilayətinin (DQMV) daxili işlər orqanlarında müxtəlif vəzifələrdə çalışıb.
DQMV Daxili İşlər Şöbəsində çalışarkən millətçi ermənilər tərəfindən ona qarşı müxtəlif təxribatlar edilib.
Saxta ittihamlarla günahlandırılan Əlif Hacıyev 10 il həbs cəzasına məhkum olunub, sonradan bəraət alaraq azadlığa buraxılıb.
1990-cı ildə Xocalıya qayıdaraq Qarabağda yaradılan Təşkilat Komitəsində, Qarabağa Xalq Yardımı Komitəsində fəaliyyət göstərərək erməni millətçilərə qarşı mübarizəsini davam etdirib.
1990-cı ilin dekabr ayında daxili işlər orqanlarına yenidən bərpa olunub və Xocalı təyyarə limanı xətt daxili işlər bölməsinə rəis təyin olunmaqla yanaşı, Xocalı aeroportunun komendantı olub.
1991-ci ilin dekabr ayında ona "mayor" rütbəsi verilib.
Əlif Hacıyevin əzmkarlığı nəticəsində Xocalı aeroportu erməni millətçilərin nəzarətindən tamamilə çıxarılıb.
Ermənilərin "Xocalı əməliyyatı"na başladığı 25 fevral 1992-ci ildə Xocalı camaatının kəndi tərk etmək barədə ermənilər tərəfindən edilən xəbərdarlığı qəbul etməyib, Bakıdan kömək gözlədiyi bir vaxtda Əlif Hacıyev və dəstəsi səhər saat 5-ə qədər azğınlaşmış düşmənlə vuruşub.
Döyüşlər qeyri-bərabər qüvvələr arasında getsə də, Ə.Hacıyev misilsiz qəhrəmanlıq göstərərək, bir dəstə dinc əhalini Ağdamın Şelli kəndinə tərəf təhlükəsiz yerə çıxara bilib. Həmin gecə meşədə sakinləri yola salıb geri qayıdanda balaca bir oğlan uşağına papağını hədiyyə edib, ona demişdi ki, "qayıtsam, papağımı qaytararsan. Yox, əgər qayıtmasam, papağımı yadigar saxlayarsan".
Təəssüf ki, o, bir daha qayıtmır. Yenidən döyüşə atılan Əlif avtomatın darağını dəyişərkən düşmən gülləsindən şəhid olur.
Hadisə şahidləri danışırlar ki, onun cəsədi Xocalıda beş gün böyürtkən kolunun dibində qalmışdı. Əlifin Nazim adında işçisi Hacıyev vurulanda həmin kolun dibində onun yerini rahatlayıb, sırıqlısını da üstünə örtmüşdü. Nazim oradan Əlif Hacıyevin cəsədini götürəndə isə ermənilərdən biri deyib: "Əgər bilsələr, bu, Əlifin meyitidir, onu sizə verməyəcəklər". Ona görə də Nazim Əlif Hacıyevin cəsədini maşında o biri meyitlərin altında gizlədib gətirmişdi.
Əlif Hacıyev Bakıda, Şəhidlər xiyabanında dəfn edilib.
Ailəli idi. Zərinə və İradə adlı iki qızı var.
Azərbaycan Respublikası Prezidentinin 6 iyun 1992-ci il tarixli 831 saylı Fərmanı ilə mayor Əlif Lətif oğlu Hacıyev ölümündən sonra "Azərbaycanın Milli Qəhrəmanı" adına layiq görülüb.
Hazırda Bakının Nizami rayonundakı küçələrdən biri qəhrəmanın adını daşıyır.
