Bakı-Sumqayıt yolundan istifadə edənlərin diqqətinə: Ekspres xətt açılır - FOTO/VİDEO

“BakuBus” MMC yanvarın 21-dən Bakı-Sumqayıt marşrut xətti üzrə fəaliyyətə başlayacaq.

Oxu.Az xəbər verir ki, bu barədə “Baku Bus” MMC və Azərbaycan Yerüstü Nəqliyyat Agentliyinin (AYNA) birgə məlumatında qeyd edilib.

Müvafiq videoçarx sosial şəbəkə üzərindən “Baku Bus” MMC-nin mətbuat katibi Əsmər Əliyeva tərəfindən paylaşılıb. Məlumata görə, ekspres marşrut xətti Bakı Avtovağzalından Sumqayıt Avtovağzalına və əks istiqamətə olacaq. Bu xəttə buraxılacaq avtobuslar komfortlu nəqliyyat vasitəsi hesab olunur.

Hər biri 48 oturacaqdan ibarət olan avtobuslarda sərnişinlərin yüklərini yerləşdirə bilmələri üçün baqaj bölməsi də mövcuddur.

Ekspres avtobus xəttinin dayanacaq nöqtələri bəlli olub. Belə ki, sərnişinlər Bakı Avtovağzalından Sumqayıt Avtovağzalına və əks istiqamətə hərəkət edən sərnişin avtobuslarından Bakı Beynəlxalq Avtovağzal Kompleksində, metronun Avtovağzal stansiyasında, Ceyranbatan qəsəbəsində, Sumqayıt dairəsində, Bağçalı evlər yaşayış kompleksində, Sumqayıt Avtovağzalındakı dayanacaqlardan istifadə edə bilərlər.

Avtobuslar arasındakı interval 11 dəqiqə, pik saatlarda isə 7-8 dəqiqə təşkil edəcək. Avtobuslar Sumqayıtdan səhər saat 5:50-də, Bakıdan isə səhər saat 6:30-da çıxacaq. Avtobusların sonuncu reysi Bakıdan axşam saat 23:00-da, Sumqayıtdan isə axşam 22:20-də yola düşəcək. Ekpress marşrut xətti üzrə gediş haqqı 0,80 qəpik təyin edilib. 

Qeyd edək ki, gediş haqqı nağdsız, yəni “BakıKart” vasitəsilə həyata keçiriləcək.

Könül Cəfərli