"Biz gələndə gördük ki, artıq boğulublar" – Şəhidin valideynlərinin faciəli ölümü

Vətən müharibəsi şəhidi Vahid Ağayevin hər iki valideyni eyni gündə dünyasını dəyişib.

Şəhidin atası Məcnun Ağayev və anası Gülnaz Ağayeva yaşadıqları evdə dəm qazından zəhərlənərək ölüblər.

"Biz gələndə gördük ki, artıq boğulublar. Övladlarından biri 44 günlük Vətən müharibəsində şəhid olub, digəri isə onların yanında qalırdı. Uşaq evə gələndə valideynləri yox idi, hamamın qapısını açanda isə anasının yerdə olduğunu görüb", - qonşulardan biri bildirib.

Şəhid Vahid Ağayevin valideynləri Maştağa qəbiristanlığında dəfn edilib.

Daha ətraflı Baku TV-nin videomaterialında:

04 mart, 17:50

Bakıda dəm qazından ölən şəhid Vahid Ağayevin anası Gülnaz Ağayeva Sabunçu Tibb Mərkəzinin Cərrahiprofilli reanimasiya şöbəsinin əməkdaşı olub.

Oxu.Az xəbər verir ki, bu barədə Sabunçu Tibb Mərkəzi məlumat yayıb.

11:21

44 günlük Vətən müharibəsi şəhidi Vahid Ağayevin valideynləri - Gülnaz Ağayeva və atası Məcnun Ağayev təcili yardım hadisə yerinə çatana qədər dünyalarını dəyişiblər.

Oxu.Az bildirir ki, bu barədə Tibbi Ərazi Bölmələrini İdarəetmə Birliyinin (TƏBİB) məlumatında deyilir.

"Respublika Təcili və Təxirəsalınmaz Tibbi Yardım Mərkəzinə 03.03.2025-ci il tarixində saat 18:45-də Maştağa qəsəbəsi, H.Aslanov küçəsi ərazisində yerləşən həyət evindən dəm qazı zəhərlənməsi səbəbilə çağırış qeydə alınıb.

Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 52 və 57 yaşlı iki nəfərin (qadın və kişi cinsli) həkiməqədər ölüm faktı qeydə alınıb", - məlumatda bildirilir.

03 mart, 23:40

Bakıda 44 günlük Vətən müharibəsi şəhidi Vahid Ağayevin valideynləri həlak olublar.

Oxu.Az xəbər verir ki, bu barədə Vətən müharibəsi şəhidi mayor Vüsal Vəliyevin qardaşı Elyar İslamoğlu məlumat yayıb.

Hadisə axşam saatlarında, Sabunçu rayonunun Maştağa qəsəbəsində qeydə alınıb.

Belə ki, şəhidin anası Gülnaz Ağayeva və atası Məcnun Ağayev dəm qazından ölüblər.

Qeyd edək ki, Vahid Ağayev 1996-cı ilin sentyabrın 14-ündə Bakı şəhəri, Maştağa qəsəbəsində anadan olub. Ailədə öz əkiz qardaşı ilə birlikdə iki uşaq olublar.

2014-cü ildə Maştağadakı C.Cabbarlı adına 187 saylı məktəbi bitirib. 2020-ci ilin sentyabrın 29-da səfərbərlik yolu ilə II Qarabağ müharibəsinə yollanıb. Xocavənd, Füzuli, Cəbrayıl və Şuşada döyüşüb. 2020-ci il noyabrın 11-də Şuşada şəhid olub. 17 noyabr 2020-də Maştağadakı Şəhidlər Xiyabanında dəfn olunub.

Ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə", "Şuşanın azad olunmasına görə" medalları ilə təltif olunub.

Vahid Ağayev subay idi. Onun ailəsindən yalnız sağlamlıq imkanları məhdud qardaşı sağ qalıb.