Bu gün Xalq artisti Ağaxan Abdullayevin doğum günüdür

Bu gün Azərbaycanın muğam ifaçıları arasında öz dəst-xətti ilə tanınan sənətkar, Xalq artisti Ağaxan Abdullayevin doğum günüdür.

Oxu.Az xatırladır ki, görkəmli xanəndə Ağaxan Abdullayev 1950-ci il fevralın 6-da Bakı şəhərinin Əmircan kəndində anadan olub. 1958-1968-ci illərdə 84 nömrəli orta məktəbdə, 1969-1973-cü illərdə isə Asəf Zeynallı adına orta ixtisas musiqi məktəbində təhsil alıb. 1973-cü ildə Əbilov adına Mədəniyyət Evinə muğam ixtisası üzrə müəllim vəzifəsinə dəvət olunub.

Xanəndə pedaqoji və maarifçilik fəaliyyətinə böyük önəm verib. O, 1977-ci ildən ömrünün sonunadək A.Zeynallı adına musiqi məktəbində muğamdan dərs deyib, gənc xanəndələr nəslinin yetişməsinə böyük əmək sərf edib, bir çox tanınmış xanəndələrin ustadı kimi tanınıb.

Ömrünün 40 ilini Azərbaycan musiqisinin inkişafı və təbliğinə həsr edən böyük sənətkar Ağaxan Abdullayev dünyanın 20-dən çox ölkəsinə qastrol səfərləri edib.

Ömrünü musiqimizi dünyaya tanıtmağa həsr edən xanəndəmiz Azərbaycan muğamlarını, xalq və bəstəkar mahnılarını böyük şövqlə, əsl ustalıqla ifa edib. Onun Azərbaycan musiqisinin inkişafı naminə gördüyü işlər hər zaman yüksək qiymətləndirilib və xanəndə fəxri adlar, orden və medallarla mükafatlandırılıb.

Ağaxan Abdullayevin böyük məharətlə və ilhamla ifa etdiyi muğam dəsgahlarının audio və videoyazıları Azərbaycan Televiziyasının qızıl fondunda saxlanılır.

Böyük ustad Ağaxan Abdullayev uzun sürən ağır xəstəlikdən sonra 2016-cı il dekabrın 25-də 66 yaşında Bakıda vəfat edib. Vəsiyyətinə əsasən, Türkan qəsəbəsi kənd qəbiristanlığında valideynlərinin yanında torpağa tapşırılıb.

Bu gün Xalq artisti Ağaxan Abdullayevin doğum günüdür