Bu gün Bakı şəhəri, Xəzər rayonu, Buzovna qəsəbəsində dənizdə bacı və iki qardaşının batdığı ərazidə daha əvvəl 4 dost da həyatını itirib.
Bu barədə Fövqəladə Hallar Nazirliyinin (FHN) əməkdaşı Fərid İlhamoğlu Baku TV-yə bildirib.
O əlavə edib ki, FHN tərəfindən aparılmış monitorinqlər zamanı bu kimi qayalıq və təhlükəli ərazilər ən riskli məkanlar kimi qeydə alınıb:
"Hətta onların adlarını da çəkmək istərdim. Belə ki, Mərdəkan-Şüvəlan qəsəbəsində yerləşən "Şimal" DRES, "Milqaya", Bilgəh qəsəbəsi, Nardaran qəsəbəsində yerləşən 12-ci dalan və "Daçnik", Novxanı qəsəbəsindəki Sarıqaya və Sahil qəsəbəsində yerləşən "Mayak" kimi tanınan ərazilər ən təhlükəli məkanlar hesab edilir.
Vətəndaşlarımızdan xahiş edirik ki, bu cür ərazilərə daxil olaraq həyatlarını təhlükəyə atmasınlar. Çünki həmin yerlər bol qayalıqlar, sualtı axınlar, yarğanlar və çuxurlarla zəngindir. Bu xüsusiyyətlər insan həyatı üçün ciddi təhlükə yaradır".
Bakı şəhəri, Xəzər rayonu, Buzovna qəsəbəsində dənizdə üç nəfər batıb.
Oxu.Az-ın sorğusuna cavab olaraq Fövqəladə Hallar Nazirliyindən (FHN) məlumat verilib.
Bildirilib ki, FHN-in "112" qaynar telefon xəttinə Bakı şəhəri, Xəzər rayonu, Buzovna qəsəbəsində ən yaxın sularda xilasetmə məntəqəsindən 1.3 km aralı dənizdə nəzarətsiz ərazidə 3 nəfərin batması barədə məlumat daxil olub:
"Məlumatla əlaqədar dərhal nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunublar.
Vətəndaş - 2009-cu il təvəllüdlü A.Həmidova xilas olunub ilkin yardım göstərilərək aidiyyəti üzrə təhvil verilib, onun qardaşı, 2014-cü il təvəllüdlü Əli Rafiq oğlu Həmidovun meyiti isə sahildə aşkar edilib.
Hazırda suda batdığı ehtimal olunan digər vətəndaş - A.Həmidovanın digər qardaşı, 2004-cü il təvəllüdlü Ruslan Rafiq oğlu Həmidovun axtarışları davam etdirilir.
Əlavə məlumat veriləcək", - deyə məlumatda bildirilib.
