Arıqlamağa çalışan bir çox insan elə səhvlər edirlər ki, bu səhvlər nəinki çəki itirməyə mane olur, hətta əlavə çəki yığılmasına səbəb ola bilər.
Oxu.Az-ın gazeta.ru-ya istinadla verdiyi məlumata görə, bu barədə tanınmış rusiyalı endokrinoloq və diyetoloq, tibb elmləri namizədi Oksana Mixalyeva xəbərdarlıq edib.
O, ən geniş yayılmış səhvlər barədə məlumat verib.
"Ən böyük səhv qidalanmada həddindən artıq ciddi məhdudiyyətlərdir. İnsanlar tez arıqlamaq istəyərək, qəfildən kalori qəbulunu kəskin azaldırlar. Bu, metabolizmi yavaşladır və xüsusilə zülal çatışmazlığı zamanı əzələ kütləsinin itirilməsinə gətirib çıxarır. Adətən, normal qidalanmaya qayıtdıqdan sonra belə hallarda yağ kütləsi çox sürətlə bərpa olunur. Tez-tez 60-70 kq-dan başlayanlar bir neçə ildən sonra 100 kq və daha çox çəkiyə çatırlar", - deyə Mixalyeva izah edib.
İkinci tez-tez rast gəlinən səhv kimi o, pəhriz zamanı həddindən artıq spirtli içki qəbulunu qeyd edib. Müntəzəm spirtli içki qəbulu rasionun kalorililiyini artırır. Buna əlavə olaraq, onu çox vaxt yüksək kalorili qəlyanaltılarla birləşdirirlər.
Diyetoloqun sözlərinə görə, digər geniş yayılmış səhv, gün ərzində yalnız bir məhsul - kefir, yumurta və ya ət kimi monodiyeta adlanan pəhrizlərlə arıqlamağa çalışmaqdır.
"Belə pəhrizlər qida maddələrinin çatışmazlığına səbəb olur və maddələr mübadiləsini pozur. Kurs bitdikdən sonra sürətli çəki artımı baş verir", - deyə həkim xəbərdarlıq edib.
Fiziki aktivliyin əhəmiyyətinin lazımınca qiymətləndirilməməsi də bir səhvdir. Mixalyevanın izah etdiyi kimi, müntəzəm yükün olmaması əzələ itkisini gücləndirir və metabolizmi yavaşladır.
"Gün ərzində qida qəbulunu bərabər bölüşdürmək də vacibdir. Uzun müddət ac qalmaq və sonra sıx şam yeməyi arıqlamağı çətinləşdirir", - deyə mütəxəssis əlavə edib.
