Digahda avtomobil vuran ana və iki azyaşlının son durumu AÇIQLANDI

"Digahda baş verən yol-nəqliyyat hadisəsi zamanı xəsarət alan iki azyaşlının vəziyyəti ağırdır".

Bunu Oxu.Az-a açıqlamasında Kliniki Tibbi Mərkəzin Mətbuat Xidmətinin katibi Ruzbeh Məmməd deyib.

"8 yanvar 2025-ci il tarixdə iki nəfər azyaşlı (kişi cinsli) yol-nəqliyyat hadisəsi nəticəsində kəllə-beyin travması ilə Kliniki Tibbi Mərkəzə hospitalizasiya edilib.

Travmatik beyin qansızma diaqnozu ilə Reanimasiya şöbəsinə yerləşdirilib. Hər ikisinin vəziyyəti ağır qiymətləndirilir. Ana isə heç bir xəsarət almayıb", - deyə R.Məmməd bildirib.

16:46

"Abşeron rayonu, Digah qəsəbəsi, Hüseyn Rəhimov küçəsində baş verən yol-nəqliyyat hadisəsi zamanı ana və iki övladını avtomobil vurub".

Bunu Oxu.Az-a açıqlamasında Baş Dövlət Yol Polisi İdarəsinin (BDYPİ) rəsmisi polis polkovnik-leytenantı Mübariz Ağayev deyib.

O, qeyd edib ki, hadisə bu gün saat 11:30-da qeydə alınıb.

"Abşeron rayon sakini Dərgah Dərgahov idarə etdiyi "Toyota" markalı, 10-SY-242 dövlət qeydiyyat nişanlı avtomobillə yolu nəzərdə tutulmayan yerdən keçən Ramilə Məmmədova və onun iki azyaşlı övladını vurub.

Xəsarət alan hər üç şəxs xəstəxanaya çatdırılıb.

BDYPİ bir daha sürücülərlə yanaşı piyadalara da yol-hərəkəti qaydalarına qeyd-şərtsiz əməl etməyə, özlərinin və başqalarının həyat və sağlamlığını təhlükəyə atmamağa çağırır", - deyə M.Ağayev vurğulayıb.

Faktla bağlı araşdırma aparılır.

15:43

Bu gün günorta saatlarında Abşeron rayonu, Digah qəsəbəsində yol-nəqliyyat hadisəsi baş verib.

Bu barədə Oxu.Az-a məlumat daxil olub.

Qeyd olunub ki, Səxavət Məmmədov adına tam orta məktəbin qarşısında üç uşağı və onların anasını maşın vurub.

"Ölən və yaralananlar var. Yaralılar Kliniki Tibbi Mərkəzə aparılıblar. Bu yolda nə sürət həddini aşağı salırlar, nə də yola işıqfor qoyurlar", - deyə məlumatda bildirilib.

Kliniki Tibbi Mərkəzdən Oxu.Az-ın sorğusuna cavab olaraq bildirilib ki, hadisə ilə bağlı KTM-ə müraciət edən olmayıb.

Faktla bağlı araşdırma aparılır.

Əzizə İsmayılova