"Hazırda Azərbaycana müxtəlif yollarla saxta və qeyri-orijinal ehtiyat hissələri gətirilir. Azərbaycanda avtomobil bazarında saxta ehtiyat hissələrinin dövriyyəsi, qeyri-rəsmi avtomobil satışı və bunun yaratdığı təhlükələr nəqliyyat təhlükəsizliyi baxımından ciddi risklər yaradır".
Bu fikirləri Oxu.Az-a açıqlamasında "Avtomobil bazarında təhlükəsizlik, istehlakçı hüquqları və qeyri-rəsmi avtomobil ticarəti" mövzusunda keçirilən tədbir çərçivəsində nəqliyyat məsələləri üzrə ekspert Elməddin Muradlı deyib.
Onun sözlərinə görə, "Təhlükəsiz Mobilliyə Doğru" layihəsinin əsas məqsədi nəqliyyat təhlükəsizliyinin yalnız yol hərəkəti qaydaları ilə məhdudlaşmadığını, texniki cəhətdən saz nəqliyyat vasitələrinin və keyfiyyətli ehtiyat hissələrinin də bu sahədə mühüm rol oynadığını diqqətə çatdırmaqdır:
"Eyni qablaşdırma, eyni loqo, eyni holoqramlardan istifadə olunur. Müştərilər artıq seçim edə bilmirlər ki, hansı keyfiyyətlidir, hansı saxtadır. Nəticədə vətəndaş qeyri-orijinal ehtiyat hissəsi alır, sonradan avtomobilində problem yarananda isə məsuliyyəti rəsmi dilerdən tələb edir. Araşdırma zamanı məlum olur ki, avtomobilə saxta ehtiyat hissəsi quraşdırılıb".
E.Muradlının sözlərinə görə, son dövrlərdə baş verən bəzi avtomobil yanğınlarının səbəbi də keyfiyyətsiz ehtiyat hissələri ola bilər:
"Bu gün hərəkətdə və ya dayanmış vəziyyətdə yanan avtomobilləri görürük. Belə halların səbəblərindən biri keyfiyyətsiz ehtiyat hissələridir. Xüsusilə işıq avadanlıqları təhlükə yaradır. Hətta adi bir lampa belə ciddi problemə səbəb ola bilər".
Ekspert digər mühüm problemin "boz bazar" adlandırılan qeyri-rəsmi avtomobil satışı olduğunu vurğulayıb.
O qeyd edib ki, rəsmi dilerlər zəmanətlə satış həyata keçirsələr də, eyni avtomobillərin Çin bazarı üçün istehsal olunmuş versiyaları fərdi satıcılar tərəfindən daha ucuz qiymətə ölkəyə gətirilir:
"Vətəndaş düşünür ki, 3-5 min dollar qənaət edib. Amma nəzərə almır ki, həmin avtomobil başqa region üçün istehsal olunub. Azərbaycanın yol, iqlim və yanacaq şəraiti üçün Avropa versiyaları nəzərdə tutulur. Bu avtomobillər isə heç bir zəmanət olmadan satılır. Problem yarananda nə avtomobili geri qaytarmaq olur, nə də hüquqi təminat mövcuddur".
E.Muradlı xüsusilə elektrik avtomobillərində risklərin daha böyük olduğunu bildirib:
"Elektrik avtomobilinin batareyasının qiyməti ən ucuz halda 5-8 min dollardır. Vətəndaş avtomobili alarkən 3-5 min dollar ucuz qiymətə üstünlük verir, amma sonradan batareya sıradan çıxanda həmin məbləği bir dəfəyə itirir. Qarşıdakı beş il ərzində onu hansı xərclərin gözlədiyini də nəzərə almaq lazımdır".
Ekspert vətəndaşları avtomobil və ehtiyat hissələri seçərkən diqqətli olmağa çağırıb.
O, həmçinin hesab edir ki, dövlət rəsmi dilerlərin hüquqlarının qorunması istiqamətində addımlar atmalıdır:
"Rəsmi dilerlər böyük vergi ödəyiciləridir, yüzlərlə, minlərlə iş yeri yaradırlar. Avropada Çin avtomobillərinə münasibət artıq dəyişib, müəyyən məhdudiyyətlər tətbiq olunur. Azərbaycanda isə bazar faktiki olaraq açıqdır".
