Əsrlərin yadigarı Diri baba türbəsi dağılır - VİDEO

Azərbaycan memarlığının incisi - Diri baba türbəsi dağılma təhlükəsi ilə üz-üzə qalıb.

Oxu.Az-ın bölgə müxbirinin xəbərinə görə, Qobustan şəhərində dağın döşündə tikilmiş ikimərtəbəli türbə xatirə məscidi vəzifəsini daşıyırdı.

Memarlıq obrazının orijinallığı, tikinti kompozisiyasının təkraredilməzliyi və təbiətlə sıx əlaqəsinin olmasına görə, bu abidə memarlıq tarixində xüsusi yer tutur. Binanın mərtəbələrini bir-birindən ayıran dekorativ yazı kəmərində abidənin 1402-ci ilə inşa oldunduğu həkk olunub.

Yazıya görə, bu türbə ustad Hacının oğlu tərəfindən tikilib. Türbənin birinci mərtəbəsində iki otaq var.

Ötən il kimliyi bəlli olmayan şəxs və yaxud şəxslər tərəfindən abidəyə zərər vurulub. Abidənin birinci və ikinci mərtəbələrində yerləşən pəncərələrin daş şəbəkələri dağıdılıb. Həmin hadisədən sonra türbədə hər hansı bir təmir-bərpa işləri aparılmayıb. Bu hal turistlər tərəfindən də xoş qarşılanmır.

Rayon İcra Hakimiyyətindən verilən məlumata görə, ötən ilin fevral ayında abidəyə ziyan vurulub və həmin məslə Rayon Polis Şöbəsi tərəfindən araşdırılır. Abidənin bərpası ilə bağlı Mədəniyyət və Turizm Nazirliyinə olunan müraciətə müsbət rəy verilib.

Yaxın vaxtlarda abidədə təmir-bərpa işlərinin aparılması gözlənilir.

Əsrlərin yadigarı Diri baba türbəsi dağılır - VİDEO

Rəşad Aydın, Hüseyn Qasımov