"Qərbi azərbaycanlılar sonuncu deportasiya zamanı Qarabağ müharibəsinin tərkib hissəsi kimi və bu savaşın ilkin mərhələsində öz ata-baba yurdlarından qovulublar. Qarabağ müharibəsi bitib, bu gün Ermənistanla Azərbaycan arasında sülh danışıqları gedir və bunun bir şərti kimi Qərbi Azərbaycan qaçqınlarının da öz ata-baba yurdlarına qayıtması məsələsinə aydınlıq gətirilməlidir".
Oxu.Az xəbər verir ki, bunu Qərbi Azərbaycan İcmasının (QAİ) İdarə Heyətinin sədri Əziz Ələkbərov "Qərbi Azərbaycana Qayıdış: Tarixi ədalətin bərpası və insan hüquqları" adlı tədbirdə jurnalistlərə açıqlamasında deyib.
O bildirib ki, bu onların təkcə insanlıq haqqı deyil, eyni zamanda beynəlxalq hüquqa söykənən hüququdur:
"Çox təəssüf ki, Ermənistan rəhbərliyi sülh danışıqları getsə də, bu istiqamətdə xeyli uğurlara imza atılsa da, Qərbi Azərbaycan qaçqınlarının öz doğma evlərinə qayıtmasına hələ də mane olur.
Bizim istər beynəlxalq təşkilatlara, istər Ermənistan rəhbərliyinə etdiyimiz müraciətlər indiyədək cavabsız qalmaqdadır. Amma Ermənistan rəhbərliyi birdəfəlik bilməlidir ki, regionda formalaşmış - dövlətimiz və Azərbaycan Prezidenti tərəfindən yaradılmış bu reallıqlarla hesablaşmağa məcburdur. Çünki sülhün əsas təminatı birgəyaşayışdır.
Ermənistan və Azərbaycan xalqları əgər bu birgəyaşayışa qoşulmayacaqlarsa, insanlar öz ata-baba yurdlarına qayıtmayacaqsa, təbii ki, bu sülhün də davamlı olacağını düşünmək bir az absurd olardı. Ona görə də biz Qərbi Azərbaycan İcması olaraq sülhün, bölgəyə əmin-amanlığın gəlməsinin tərəfdarıyıq və Azərbaycanla Ermənistan arasında gedən bu sülh danışıqlarını alqışlayırıq. Amma rəsmi İrəvan bu insanların öz doğma evlərinə qayıdışını da qəbul etməli, buna razılaşmalıdır.
Bizim Qayıdış Konsepsiyamızda prosesin bütün detalları öz əksini tapıb. Həmin detallara tam uyğun şəkildə, yəni dinc yolla, ləyaqətli şəkildə, ora qayıdan insanların təhlükəsizliyini təmin və bütün hüquqlarını bərpa etmək şərti ilə bu insanların öz doğma evlərinə qayıdışı təmin olunmalıdır".
