Kubra Məhərrəmova yazır...
Bakının Moskva kimi yanması an məsələsidir. Tarix boyu Moskva dəfələrlə güclü yanğınlara məruz qalıb və hələ də bu yanğınların əsl səbəbi tam müəyyən olunmayıb.
1812-ci ildə Fransa ordusu, Napoleonun rəhbərliyi ilə Rusiyaya hücum edəndə Moskva yanır. Hələ də bilinmir ki, Moskvanı kim yandırmışdı. Fransızlar, ya rusların özü.
Tarixə bircə o məlumdur ki, şəhərin böyük hissəsi məhv olmuş, xeyli insan həyatını itirmişdi.
Bakıda son illərdə baş verən yanğınların səbəbini də kimsə tarixin qaranlıq küncünə atır. Üç-beş gün danışılır, unudulur.
Bir neçə il əvvəl eyni hadisə mənim yaşadığım binada baş vermişdi. Eynilə elektrik qutusu yandı, bina tüstüyə qərq oldu, təxliyə oluna bilmədik. 11-ci mərtəbədə ölümlə üz-üzə qaldıq. Bəxtimizdən alov tez ram olundu, binadan çıxdıq. Çoxsaylı şikayətlər ünvanlasam da, "üstünü örtdülər". FHN-ə yazdığım şikayətdən də səs çıxmadı.
Amma Yasamal rayonunda baş verən yanğında adam öldü, hörmətli məmurlar!
Körpə bala yox oldu.
Bayaq vəkil Əli Qəmbərli ilə danışdım. Başsağlığı verdim.
Bir kəlmə dedi, "mənim balam məhv oldu, başqaları məhv olmasın!"
Əli Qəmbərlinin digər ailə üzvləri ağır vəziyyətdə xəstəxanada yaşamaq uğrunda mübarizə aparırlar.
Təsəvvür edək ki, mən öz evimdə kafe açmışam, qonaq qəbul edirəm. Sizcə, belə bir şey mümkündürmü?
Qida Təhlükəsizliyi Agentliyi, "jek müdiri" başımın üstünü kəsəcək ki, "ay xanım, qeyri-qanuni fəaliyyətlə məşğulsunuz!"
Amma nə məsələdirsə, restoran və kafelərin çoxu qeyri-qanuni işləyir və yaxşı da pul qazanır. Diqqət edin, restoranların əksəriyyəti yaşayış binalarının altında fəaliyyət göstərir.
Azərbaycan Respublikası Dövlət Şəhərsalma və Arxitektura Komitəsinin Kollegiyası tərəfindən təsdiq edilmiş "Yaşayış binalarının layihələndirilməsi qaydaları" ilə müəyyən edilib ki, "yaşayış binalarının zirzəmisində, həmçinin binanın birinci, ikinci mərtəbələrində ictimai təyinatlı obyektlərin yerləşdirilməsi 250 kvadratmetrdən az olarsa və oturacaq yerlərin sayı 50-dən az olduğu halda icazə verilir".
Buna baxmayaraq, paytaxtın bir çox yaşayış binalarının altında belə obyektlər fəaliyyət göstərir. Hətta eləsi var ki, hamam açıb, hələ başqa fəaliyyətlə də məşğuldur. Amma sübut etmək olmur.
Həmişə demişəm ki, Allahın bizə yazığı gəlir. Bir balaca zəlzələ olsa Bakı Şamaxıdan betər çökəcək.
Heç kimə sirr deyil ki, çoxmənzilli binaların tikilişi və istifadəyə verilməsinə bir çox dövlət qurumları cavabdehlik daşıyır.
Binaya baxırsan, çəpəki durub, amma yaşayışa icazə verilib, insanlar yaşayırlar. Binalar bir-birinə o qədər yaxın tikilib ki, yanğın baş verərkən, heç bir texnika yaxınlaşa bilmir.
Əsas odur ki, kimsə pulu alıb, tikintiyə icazə verib. Amma həmin məmurların hamısı şəhərdən kənarda xətadan-bəladan uzaq, bağ evlərində yaşayır.
Nə yanğından qorxur, nə də zəlzələdən. Özləri üçün dağılmaz qala tikiblər. Xalqın balası isə yanğında həyatını itirir.
Bilirsiniz ən dəhşətlisi nədir? Ölkədə müharibə yox, döyüş vəziyyəti yox, insanlar isə məmurlara görə ölürlər.
Lift qırılır adam ölür, tuneli su basır, adamlar ölürlər, yanğın olur adamlar ölürlər, yol çökür adam ölür... Bunların heç biri fövqəladə hadisə deyil, rüşvətin və məmur harınlığının nəticəsidir.
Yadınızdadırsa on il əvvəl binanın üzlüyünün alışması nəticəsində insanlar həyatını itirmişdilər. Nə oldu? Heç nə. Yenə "jek müdiri"ni həbs elədirlər məsələ bitdi.
Bu dəfə də belə olacaqsa, deməli bu yanğınlar yenə də baş verəcək, yenə də günahsız adamlar həyatını itirəcəklər.
Yasamalda baş verən faciə şahidləri danışırlar ki, bizi polislər xilas etdilər. Polislər olmasaydı daha çox insan itkisi olacaqdı.
Hüquqşünas Əli Qəmbərli deyir ki, "ailə üzvlərimi xəstəxanaya Post Patrul Xidmətinin avtomobilində apardım. Onlar olmasaydı bütün ailəmi itirəcəkdim!"
Niyə hər dəfə belə hadisə baş verəndə məsuliyyət daşıyan adamlar yox olurlar? Sonra yenə heç nə olmamış kimi peyda olub işlərinə davam edirlər?
Əslində isə hamımız Bakıda, barıt çəlləyinin üstündə oturmuşuq.
