"Bakı 2026-cı ildə İƏT-ə üzv dövlətlərin antikorrupsiya qurumlarının yüksəksəviyyəli görüşünə ev sahibliyi edəcək".
Oxu.Az-ın məlumatına görə, bunu Bakıda keçirilən BMT-nin Narkotiklər və Cinayətkarlıq üzrə İdarəsinin Korrupsiyaya qarşı Mübarizə üzrə Hüquq-Mühafizə Orqanlarının Qlobal Əməliyyat Şəbəkəsinin ("GlobE" Şəbəkəsi) altıncı plenar iclasının bağlanış mərasimində baş prokurorun müavini Heydər Məmmədov deyib.
Baş prokurorun müavini Azərbaycan hökumətinin korrupsiya ilə mübarizənin qarşısında qoyduğu güclü iradəni və bu sahədəki hüquqi təşəbbüsləri qeyd edərək, ölkənin antikorrupsiya tədbirlərinin qlobal səviyyədə dəstək tapdığını bildirib.
Heydər Məmmədov qeyd edib ki, ötən ilin 26-27 noyabr tarixlərində baş prokuror Kamran Əliyevin rəhbərliyi ilə nümayəndə heyətinin iştirak etdiyi İslam Əməkdaşlıq Təşkilatına (İƏT) üzv dövlətlərin korrupsiyaya qarşı mübarizə aparan hüquq-mühafizə orqanlarının ikinci yüksək səviyyəli görüşündə Azərbaycan İƏT-ə üzv dövlətlərin antikorrupsiya qurum rəhbərlərinin Bürosunun sədr müavini seçilib.
Həmçinin 2026-cı ildə keçiriləcək növbəti sessiya və yüksəksəviyyəli görüşə ev sahibliyi etmə hüququ Azərbaycana həvalə olunub.
Qeyd edilib ki, Bakıda üç gün ərzində keçirilən iclasda dünyanın 90-dan çox ölkəsindən gələn 300-dən çox nümayəndə yeni texnologiyaların hüquq-mühafizə orqanlarına təsiri, ekoloji cinayətlərin qarşısının alınması və oğurlanmış aktivlərin bərpası kimi aktual mövzular üzərində müzakirələr aparıb.
Aqil Vəlili
