"Horadiz-Ağbənd dəmiryol xəttinin 99-cu kilometrində təhlükəsizlik məqsədilə qalereya inşa olunur".
Oxu.Az "Report"a istinadən xəbər verir ki, bunu jurnalistlərə açıqlamasında "Azərbaycan Dəmir Yolları" QSC-nin Tikinti Layihələrinin İdarə Olunması Departamentinin tikinti meneceri Əlövsət Cavadov bildirib.
Onun sözlərinə görə, dəmiryol xəttinin bu hissəsi dağlıq və qayalıq ərazidə yerləşdiyi üçün qaya parçalarının qoparaq rels üzərinə düşməsi ehtimalı var:
"Ərazinin relyefini nəzərə alınaraq burada əlavə qoruyucu qalereya layihələndirilib. Qalereyanın uzunluğu 108 metrdir və monolit dəmir-betondan inşa olunur".
Ə.Cavadov bildirib ki, Horadiz-Ağbənd dəmiryol xəttində ümumilikdə 4 tunel və 3 qalereya tikilir:
"Bu mühəndis qurğuları həm təhlükəsizliyi, həm də infrastrukturun uzunömürlülüyünü təmin etməyə xidmət edir. Layihə çərçivəsində tikinti-quraşdırma işləri mərhələli şəkildə davam etdirilir və hazırda tunellərdə işlərin 71%-i başa çatıb".
Onun sözlərinə görə, qalereyanın inşasının bu ilin sonuna qədər başa çatdırılması nəzərdə tutulub.
