Masazırda küçələrdə abadlıq işlərinə nə vaxt başlanacaq? - Rəsmi AÇIQLAMA

"Şamil Hüseynov, Arzuman Quliyev və Abşeron küçələrində gələn cari ildə abadlıq işləri görüləcək".

Bu barədə Oxu.Az-ın sorğusuna cavab olaraq Masazır kənd bələdiyyəsindən məlumat verilib.

Bildirilib ki, Şamil Hüseynov, Arzuman Quliyev və Abşeron küçələrinin də abadlaşdırılması qurumun cari il üçün Tədbirlər Planına daxil edilib:

"Son 4 il ərzində Masazır kəndində əsasən vətənimizin bütövlüyü uğrunda şəhidlik zirvəsinə ucalan qəhrəmanlarımızın adlarını daşıyan, o cümlədən onların ailə üzvlərinin yaşadığı küçələrdə abadlıq işləri aparılaraq asfaltlanıb. Bu işlər çərçivəsində təkcə ötən il ərzində kəndin 17 daxili küçəsində abadlıq işləri aparılıb. Kənddə yeni salınan daxili küçələrin abadlaşdırılaraq sakinlərin istifadəsinə verilməsi kimi məsələlər daimi olaraq yerli bələdiyyənin nəzarətində saxlanılır. Yerli özünüidarəetmə orqanlarının büdcələri sakinlər tərəfindən verilən vergilər əsasında formalaşdığından yeni salınan küçələrin asfaltlanmasında müəyyən yubanmalar müşahidə edilməkdədir. Buna baxmayaraq, o cümlədən Şamil Hüseynov, Arzuman Quliyev və Abşeron küçələrinin də abadlaşdırılması qurumun cari il üçün Tədbirlər Planına daxil edilib və il ərzində bu işlərin həyata keçirilməsi nəzərdə tutulub", - deyə məlumatda qeyd olunub.

Xatırladaq ki, yanvarın 7-də Masazır kənd sakinləri Oxu.Az-a şikayət ünvanlayaraq Şamil Hüseynov, Arzuman Quliyev küçələrinin, 6 nömrəli tam orta məktəbə gedən yolun pis vəziyyətdə olduğunu bildiriblər.

Aygün Mirakif