"Biz uşaqlarımızı balonun içində böyütmürük, real həyata hazırlayırıq".
Bunu Oxu.Az-a açıqlamasında "Qanun" nəşriyyatının direktoru Şahbaz Xuduoğlu bildirib.
O, sosial şəbəkələrdə narazılıqlara səbəb olan "Nağıllar və qaravəllilər" adlı kitabda yer alan bəzi ifadələr barədə danışıb.
"Bu kitab ilk dəfə Sovet dövründə çıxıb, "Qanun" tərəfindən təkrar nəşr olunub. Nağılların hamısı "ütülü" deyil. Azərbaycan nağıllarında senzuraya səbəb olacaq söz çoxdur. Nağıllar gündəlik həyatın yazıya alınmış formasıdır. Buna görə də burada hər hansı bir ifadələrin işlənməsi təbiidir".
Şahbaz Xuduoğlu bildirib ki, kitabın uşaq bölməsindən alınması onun "uşaq ədəbiyyatına" aid olduğu demək deyil.
"Nəşriyyatın kitabları 100 kvadratmetrlik bir məkanda satılır. Məktəblilər, uşaqlar kitabları oradan bura daşıyırlar. Buna görə də bu kitab "Uşaq ədəbiyyatı" bölməsindən götürülüb deyə, uşaq ədəbiyyatı hesab olunmalı deyil. Azərbaycan nağıllarının akademik nəşrlərində hər cür ifadə var. Onlar gündəlik həyatımızda da işlənir. Real həyatda bəzən bu kəlmələri eşidə, dərk edə bilərlər", - deyə kitabın naşiri qeyd edib.
"Nağıllar və qaravəllilər" adlı kitabda yer alan bəzi ifadələr övladına kitab alan valideynin narazılığına səbəb olub.
Oxu.Az xəbər verir ki, valideyn sosial şəbəkədəki paylaşımında kitabda "Kömür alması" adlı nağılda "Onlar bənnanın varına sahib olmaq üçün özlərinin oynaşlarını xala qızı adı ilə bənnaya verib toy eyləyirlər. Lotular arvadı öyrədirlər ki, sən özünü xəstəliyə vur" cümlələrinin yer aldığını bildirib.
Həmçinin kitabda "Gah-Gah dağında üç xiyara aşiq olasan" adlı nağılın da olduğu qeyd edilib.
Qeyd edək ki, kitab "Qanun" nəşriyyatına aiddir.
