Nərimanov prospektində qəza: Avtomobil işıq dirəyinə çırpıldı

Bakının Yasamal rayonunda yol-nəqliyyat hadisəsi baş verib.

Bu barədə Oxu.Az-a məlumat verilib.

Qeyd olunub ki, Nərimanov heykəli yaxınlığında BYD (Build Your Dreams) markalı avtomobil sürücünün idarəetməsindən çıxıb və arakəsmədə olan işıq dirəyinə çırpılıb. Hadisə nəticəsində avtomobilə ciddi ziyan dəyib, işıq dirəyi isə sıradan çıxıb.

Hadisə ilə bağlı Bakı Şəhər Dövlət Yol Polisi İdarəsinin (BŞDYPİ) baş inspektoru, polis baş leytenantı Rüstəm Əhmədli Oxu.Az-a açıqlamasında faktı təsdiqləyib.

"Hadisə bu gün saat 09:15-də Yasamal rayonu N.Nərimanov prospektində qeydə alınıb. Hadisə BYD markalı 77-SP-846 dövlət nömrə nişanlı avtomobilin sürücü Nəcəf Oktay oğlu Allahverdiyevin idarəetməni itirməsi səbəbindən baş verib", - deyə açıqlamada bildirilib.

Əzizə İsmayılova