Dünən Avropa Liqasının ikinci təsnifat mərhələsinin ilk oyunları keçirilib.
Azərbaycanı bu turnirdə təmsil edən “Qarabağ” da növbəti oyununa çıxıb.
Oxu.Az Azerisport.com-a istinadən xəbər verir ki, oyun Tofiq Bəhramov adına Respublika stadionda baş tutub.
Komandamızın bu dəfəki rəqibi Polşanın “Piast” klubudu. Avrokuboklarda debüt edən rəqibi ilə müqayisədə daha böyük Avropa təcrübəsinə malik komandamız mərhələ adlamaq üçün ilk oyunda qol buraxmadan inamlı qələbə qazanmalıydı. Əks halda səfərdə keçiriləcək cavab oyununda Qurban Qurbanovun yetirmələrinin işi çətin ola bilərdi. Təəssüf ki, oyunda hesabı qonaqlar açıblar, 15-ci dəqiqədə Martsin Robak komandasını hesabda irəli çıxarıb, lakin 35-ci dəqiqədə “Qarabağ”ın futbolçusu Ricard Almeyda möhtəşəm zərbə ile heasabı bərabərləşdirib, və 83-cü dəqiqədə Reynaldo “Qarabağ”ı hesabda önə çıxarıb.
Əzmkarlıq göstərən təmsilçimiz qələbə qazanmağı bacarıb.
Bu komandalar arasında cavab görüşü iyulun 25-də Qlivistada keçiriləcək.
Qeyd edək ki, dünən Azərbaycanın daha iki klubu Avropa Liqasının ikinci təsnifat mərhələsinin ilk oyunlarını keçirib. Belə ki, “Xəzər-Lənkəran” klubu İsrailin “Makkabi”si ilə qarşılaşıb və səfərdə keçən oyunda 2:0 hesabı ilə məğlub olub. Bakının “İnter”i isə səfərdə keçirilən oyunda Norveçin “Tromse”sinə 2:0 hesabı ilə uduzub.
