Qarabağda və Şərqi Zəngəzurda məktəblilər üçün maarifləndirmə tədbirləri və təqaüd proqramları təşkil etmək planlaşdırılır.
Oxu.Az xəbər verir ki, bu barədə Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayevin təhsil sahəsində fəaliyyət göstərən sahibkarlıq subyektlərinin rəhbərləri ilə görüşdə məlumat verilib.
Görüş iştirakçılarına məlumat verilib ki, indiyədək doğma yurduna qayıtmış 8 660 nəfər keçmiş məcburi köçkünün 1000 nəfərindən çoxu məktəblilərdir.
Görüşdə çıxış edən Kiçik və Orta Biznes Subyektləri və Klublarının Assosiasiyasının (KOBSKA) Təhsil Komitəsinin sədri Aysel Gülməmmədova özəl təhsil subyektlərinin Böyük Qayıdış prosesinə töhfə vermək istədiyini, bu məqsədlə Qarabağda və Şərqi Zəngəzurda maarifləndirmə tədbirləri həyata keçirməyi və təqaüd proqramları təşkil etməyi planlaşdırdığını bildirib.
Tədbirdə bildirilib ki, maarifləndirmə proqramı vasitəsilə şagirdlərə innovativ təhsil metodları, texnoloji bacarıqlar, liderlik keyfiyyətləri və iqtisadiyyatın müxtəlif sektorlarına dair biliklər çatdırılacaq. Gənclərin təhsili və inkişafı məqsədilə iqtisadiyyat, rəqəmsal marketinq, elektronlaşma, İT həllər, dizayn və digər bu kimi sahələrdə təqaüd proqramları təqdim olunacaq.
Rəylər