Bakıda qayınatası tərəfindən öldürülən gəlinin uşaqları nənənin himayəsinə veriliblər.
Bu barədə Oxu.Az-ın sorğusuna cavab olaraq Sosial Xidmətlər Agentliyindən (SXA) məlumat verilib.
Bildirilib ki, sözügedən uşaqlarla bağlı məlumat daxil olan kimi Əmək və Əhalinin Sosial Müdafiəsi Nazirliyinin tabeliyində SXA-nın əməkdaşları prosesə cəlb olunublar:
"Onların mövcud vəziyyətləri qiymətləndirilib. Uşaqlar hazırda nənələrinin himayəsindədirlər və o, nəvələrini dövlət himayəsinə verməkdən imtina edib. Həmçinin uşaqlar da nənələrindən ayrılmaq istəmirlər. Hazırda aidiyyəti dövlət qurumları ilə birgə nənənin uşaqların rəsmi qəyyumu təyin edilməsi istiqamətində işlər aparılır".
Xatırladaq ki, hadisə iyunun 1-də Sabunçu rayonu, Ramana qəsəbəsində məcburi köçkünlərin məskunlaşdığı "Şuşa şəhərciyi"ndə baş verib. Qəsəbə sakini, 1966-cı il təvəllüdlü Adıgözəl Məmmədov birlikdə yaşadığı gəlini, 1995-ci il təvəllüdlü Gülüzar Məmmədovanı bıçaq zərbələri ilə qətlə yetirib. Polis əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən A.Məmmədov saxlanılıb.
